Edirne Bostâncı-başısı olan Bekir Ağa'nın idâre-i umûrda kesel ü rehâveti nümâyân olduğunu Rumeli Serʿaskeri Kapudan Paşa hazretleri beyân ve Hasekîlik'den neşʾet ile Kapucu-başı olup, bir zemân Bergos'da ikāmet ve o havâlî keyfiyyâtına tahsîl-i vukūf u mümâreset eden Enbâr Emîni Mustafa Ağa'nın bu hıdmete liyâkatini âverde-i zebân buyurmalarıyla, Bekir Ağa ʿazl ve Ağa-yı mûmâ ileyh yerine vasl olunup, münhall olan Enbârlar Nezâreti'ne hâcegândan ʿAbdülkerîm Efendi dâmâdı Mehmed Efendi şâyân görüldü. Sâbıkā Süvârî Mukābelecisi olan Küçük Râşid Efendi, başına gelan felâketlerden müttaʿız olmayup, lisânını nefsine muzırr olan kelimât ile tahrîk eylediği, bu defʿa dahi gûş-i gaflet-pûşunu mûcib-i taʿrîk olup, işbu Cumâdelâhıre'nin yirmi dokuzuncu [Ü1 180a] günü bi-tarîkı'n-nefy Kıbrıs Cezîresi'ne nefy ü tebʿîd ve herze-gerd-i vâdî-yi mefsedet olanlara bu mülâbese ile izhâr-ı sûret-i inzâr u tehdîd olundu. Rumeli Kadıʿaskeri Velî Efendi-zâde [Ü2 195a] Mehmed Emîn Efendi'nin müddet-i ʿörfiyyesi gāyete resâ ve gurre-i Receb'de Sadâret-i Rumeli ile Samanî-zâde ʿÖmer Hulûsî Efendi nâyil-i ʿizz ü ʿalâ olup, iki yüz [on] üç senesi Rebîʿulevvel'inden zabt ve yevm-i zabtından ʿazli muʿteber olmak şartıyla Kazây-ı Şâm, Hâfız birâderi İbrâhîm Efendi'ye ve sene-i merkūme Receb'i gurresinden mutasarrıf olmak üzere Kazây-ı Selânik, Manyasî Mehmed Efendi'ye ve sâl-i mezkûr gurre-i Muharrem'inden mutasarrıf olmak üzere Kazây-ı Kuds-i şerîf, Bekir Paşa İmâmı[-zâde] Mehmed Saʿîd Efendi'ye ve sene-i merkūme Rebîʿulâhır'ı gurresinden zabt etmek üzere Kazây-ı İzmir, Ser-etıbbây-ı Hâssa Nu‘mân Efendi'ye tevcîh ve Kilis Sancağı Mîr-i mîrân İbrâhîm Paşa'ya ʿinâyet olunmasını Bosna Vâlîsi Vezîr Silahdâr Mustafa Paşa recâ eylediğine binâ'en, livâ'-i mezkûr gurre-i Receb'de mûmâ ileyhe tevcîh ile hâli terfîh olundu.