Hîn-i iktizâda baʿzı mahallere ʿale'l-ʿacele top yetişdirmek ve çep ü râstdan zuhûr eden firak-ı aʿdâ müdâfaʿasına kıyâm ve iktizây-ı hâl ile sâyir Topçu neferâtı gibi piyâde hidmetini iltizâm eylemek üzere Süvârî Topçu tertîbi mehâmm-ı lâzımü'l-ihtimâmdan olmağla, beher topa maʿa usta ve Yamak on ikişer nefer tertîb ve binek bârgîrlerini kendüleri tîmâr edüp, bir ʿârıza-i gayr-i zarûriyye ile bârgîrler sakat ve ʿamelden kalmak lâzım gelürse, bedeline alınan bârgîr [Ü1 179a] behâsının bir mikdârı mevâciblerine mahsûb olmak ve kānûn-nâme-i hümâyûn şurûtu bunların hakkında dahi cârî olup, süvârî serdengeçdi topçuları olarak her ortaya bir topdan yirmi beş top tertîbi maʿa Ağa ve zâbitân zamm olunup, şimdilik taʿlîm üzere olan on top neferâtı zîrde mastûr kisve-behâ ve meʿâş ve yevmiyyeleriyle tahrîr ve baʿdehû yirmi beş top tertîbine iblâğ ve bir mahalle Topçu Ortası meʾmûr kılındıkda, bunlar [Ü2 194a] o ortalara Yamak verile. Eğer birkaç topun bir orta ile ʿacâleten irsâli iktizâ eyler ise, ʿAlemdâr ve yâhûd Baş-top Ustası, Başbûğ olup, taʿyînâtlarını beraber götüreler. Ve cümlesinin başka meʾmûriyyetleri lâzım geldikde, sâyir ortalarda olan Baş-karakullukçu ve Sakā ve Karakullukçu tahrîr olunup, müstakıll Serdengeçdi bayrağı ola. Ve bir nefer Süvârî Serdengeçdi Ağası'na senevî bin guruş meʿâş ve yevmiyye sekiz çift nân-ı ʿazîz ve ikişer kıyye lahm ve bir nefer ʿAlemdâr'a ve bir nefer top ustasına senevî beşer yüz guruş meʿâş ve bir kıtʿa top tertîbinde bir nefer Süvârî top ustasına yüz akça yevmiyye ve yirmi akça kisve-behâ ve bir nefer Süvârî Yamağa yetmiş akça yevmiyye ve yirmi akça kisve-behâ ve on nefer süvârî topçularından her birine elli beşer akça yevmiyye ve yirmişer akça kisve-behâ tertîb olunup, ʿarabacılardan dahi Süvârî tertîbi lâzım gelüp, kānûn-nâme-i hümâyûnda musarrah şurût kezâlik bunların hakkında dahi cârî ve bâlâda tahrîr olunduğu üzere şimdilik on top tertîb olunup ve meʿâş ve yevmiyye ve kisve-behâlarıyla tahrîr ve taʿlîm ve teʿallüm olunarak Topçuyân yirmi beş top tertîbine iblâğ olundukda, ʿarabacılar dahi iblâğ olunmak ve bir top ile bir cebe-hâne ʿarabasını idâre eylemek üzere [Ü1 179b] maʿa Halîfe iki nefer ziyâdesiyle sekiz nefer tertîb olunup, yedlerinde olan top ve cebe-hâne ʿarabası kangı top ustasının ise ve ol usta ne mahalle meʾmûr olur ise ʿArabacı dahi ol vechile hareket edüp, topçuların süvârîleri şerâyiti ʿarabacılarda dahi cârî ola. Ve bunların baş-halîfelerine senevî beş yüz guruş [Ü2 194b] meʿâş ve yevmiyye dört çift nân ve bir kıyye lahm ve bir nefer Mülâzım Halîfe'ye senevî dört yüz guruş meʿâş ve bir top ve bir cebe-hâne ʿarabası neferâtı tertîbi üzere bir nefer Halîfe'ye yetmiş akça yevmiyye ve yirmi akça kisve-behâ ve yedi nefer Süvârî ʿArabacıyân'ın her birine kırkar akça yevmiyye ve yirmişer akça kisve-behâ olmak üzere tanzîm ve ol bâbda şeref-yâfte-i sudûr olan hatt-ı hümâyûn mahalline kayd ve iktizâ edenlere ʿilm ü haberleri verildi.