Françe ile Nemçelü birkaç seneden berü muhârebe üzere olup, bu esnâda ʿakd-i musâlaha ile defʿ-i mükâfeha eyledikleri mütevâtir olup, semere-i musâlahaları Pay-bâ Otrişin nâmıyla maʿrûf memâlik Françe'ye verilmek ve Venediklü yedinde olan Körfez ve Cante ve Kefalonya ve Ayamavra ve Cerigor, Badranto ve Larta ve Vonica ve Albanya tarafında vâkiʿ Lodrino nâm lîmânın aşağı tarafı Françe cumhûruna ʿâyid olmak [Ü2 193b] ve İstirya ve Dalmaçya ve Bahr-i Adriyatik ve "Kattaro" nâm memleketin lîmânı ve Venedik Şehri ve Körfezi İmperator tarafından zabt olunmak ve “Sanya Komodanpo" [San Giacomo] nâm mahalle dek Nemçelü ile Françe miyânında hudûd iʿtibâr olunmak ve İmperator, Çizalpina cumhûrunun bir tarafa tâbiʿ olmadığını bilmek ve İmperator hükmünde olan lîmânlarda muhârib olan devletlerin altıdan ziyâde ceng gemilerini kabûl etmemek husûslarından ʿibâret olmağla, mâdde-i mezkûre baʿzı havâdis evrâkından terceme olunup, mücelled-i vekāyiʿa sebti fâyideden hâlî olmadığına binâʾen, ber-vech-i icmâl nakş-ı sahîfe-i makāl kılındı.