Canik havâlîsinde Aʿyânlık [Ü2 184b] sevdâsıyla baʿzı mütegallibe ser-nümâ ve tîşe-i zulm ü cevr ile berkende-i hânumân-ı fukarâ olduklarına binâ'en, te'dîb ü istîsâlleri farz olduğunu, Erzurum Vâlîsi Vezîr Ziyâ Yûsuf Paşa hazretleri ʿarz edüp, teshîlen li'l-maslaha Trabzon Eyâleti tarafına tevcîh ve gûşmâl-i eşkıyâ husûsu me'mûriyyeti emr-i şerîfinde tenbîh olunmuşidi. Müşârun ileyh muktezây-ı me'mûriyyeti üzere Ordu Kasabası Aʿyânı Şeyh-oğlu'nu izâle edüp, hakkında fermân-ı kazâ cereyân sudûr eden Su-bâzârı Aʿyânı Gedik Ali-oğlu İbrâhîm üzerine dahi asker çeküp, mütehassın olduğu palangaları müsahhar-ı dest-i iktidâr ve şakī-yi merkūm üç-beş nefer ile firâr ve sâyir eşkıyâ dahi melâz ittihâz eyledikleri husûnda karâr edemeyüp, her biri bir semti ihtiyâr eylediklerini işʿâr eylediğinden başka, fîmâ-baʿd eşkıyâyı memlekete uğratmamak üzere Livâ’-i selâse müteʿayyinlerini nezr-i girâna katʿ ve yirmi kadar ru'ûs-i eşkıyâ irsâliyle mazarrat-ı mütegallibeyi defʿ eylediği ve bu meʿârikde gayreti meşhûd olan Ünye Aʿyânı Genc Ağa'ya Kapucu-başılık ve Milas Aʿyânı Sâlih Ağa'ya Silahşörlük ihsân olunmasın recâ etmekle, hıdmeti hayyiz-i kabûle resâ [Ü1 170b] olduğuna binâ'en, Dergâh-ı âlî kapucu-başılarından sâbıkā Edirne Bostancı-başısı Ahmed Ağa ile bâlâsı hatt-ı şerîf ile müzeyyen emr-i şerîfe mashûb bir kıtʿa şemşîr ve bir sevb-i semmûr kürk irsâl ve merkūm Genc Ağa, Kapucu-başılık ve Sâlih Ağa, Silahşörlük ile makzıyyü'l-âmâl oldular.