Basra ile Bağdâd miyânında sâkin olup, ekser ve eşerr kabâyilden Hazâʿil ʿAşîreti'ne baş ve zâtında hevâdâr-ı Kızılbaş olan “Hamdülhamûd” nâm kimesne Ağa Mehmed Hân'ın Bağdâd üzerine gelmek âvâzesiyle Bağdâd Vâlîsi'nin iştigālini fursat ʿadd ve cevânib-i erbaʿası miyâh ü neyistân bir mahall-i saʿbu'l-murûra bir kalʿa binâ [Ü1 169b] ve etrafını istihkâmât ile sedd eyleyüp, Bağdâd Hazînesi'ne edâsı lâzım gelan emvâl-i mîriyyeyi edâda mümâtale ve etrâf u eknâfa müdahale etmekle, mizâc-ı vakte göre sûʾ-i serîretinden igmâz ve te'dîb ü güşmâlinden i'râz olunmuşidi. el-Hâletü hâzihî gāyile-i mezkûre ber-taraf olup, şeyh-i merkūmun te'dîb ve def'-i mazarratıyla kabâyil-i sâyireyi terhîb lâzım geldiğinden, müşârun ileyh Kethudâsı'nı vâfir piyâde ve süvârî asâkir ile taʿyîn edüp, ʿaşîret-i merkūmenin mütehassın oldukları mahalle vardıklarında, sebîl-i ʿubûr mesdûd ve kesret-i miyâh mâniʿ-i neyl-i maksûd olduğunu müşâhede ile bir tarafı sedd ve ordu sığacak kadar bir mahall-i hâlîde [Ü2 184a] nasb-ı hıyâm ve miyâh-ı sâyirenin seddine ihtimâm olunduğunu muʿâyene ile kalbine hafakān ve zihnine bîm-i cân ʿârız olup, dehâlet vechiyle hemşîresini irsâl ve bi'n-nefs kendüsi gelmek üzere tâlib-i itmi'nân-ı bâl olmağla, garazı ifâte-i evkāt ve sedd-i menâfiz ile telâfî-yi mâ-fât olduğunu Kethudây-ı mûmâ ileyh ihsâs edüp: “Yevm-i merkūmda gelürse, cânına ve mâlına emân verilür” haberi gönderilüp, butûʿ-ı hareketi musaddık-ı rekîz-i zamîri olmağla, 'ale's-sabâh tertîb-i sâk u cenâh eyleyerek üzerlerine hücûm ve eşkıyây-ı ʿArab dahi mukābele edüp, mesâff-gâh-ı tarefeyn nümûne-nümây-ı yevm-i maʿlûm olup, dört sâʿat kadar hengâm-ı ceng mütemâdî ve bir nefer oğlu ahz olunup, şeyh-i merkūm iki nefer oğluyla reh-gîrây-ı bevâdî ve emvâl ü eşyaları gāret-ger-i hâzır u bâdî olduğunu müşârun ileyh Dergâh-ı vâlâ'ya ʿarz u ifâde eyledi.