Müşârun ileyh Müderrislik ile Enderûn'dan muhrec Celeb Halîl Efendi'nin Mekke-i mükerreme'de sulbünden bin yüz yirmi altı târîhinde zuhûr edüp, bülûğ-ı rüşde karîb eyyâmda tahsîl-i ʿilme meşgûl ve kırk yedide tarîk-ı tedrîse duhûl ile nâyil-i eʿazz-i me'mûl olmuşidi. Yetmiş dokuzda Selânik ile ahad-i mevâlî ve seksan beşde Şâm ve doksan târîhinde Medîne-i münevvere Kazâsı'yla kadri ʿâlî olup, doksan sekizde İstanbul Kadılığı ile mükerrem ve doksan dokuzda Anadolu ve iki yüzde Rumeli pâyeleriyle pertev-i ikbâli "Ke-nârin ʿalâ ʿalem" olmuşidi. Sene-i merkūme muntasıfında bi'l-fiʿl [Ü1 169a] Rumeli Kadıʿaskerliği'yle icrây-ı ahkâm ve mâlik-i zimâm-ı nakz u ibrâm ve iki yüz iki Safer'inde Şeyhulislâm ve üç buçuk mâhdan sonra zehrâbe-i ʿazl ile telh-kâm olup, iki yüz beş Receb'inde mükerreren Müftî'l-enâm ve Hallâl-i müşkilât-ı hâss u ʿâmm olmuşlaridi. İki yüz altı Zilka'de'sinde maʿzûl ve kûşe-güzîn-i zâviye-i hamûl olup, iki yüz on iki Cumâdelûlâ'sında vedâʿ-ı ʿâlem-i fânî ve ʿazm-i semt-i câvidânî eyledi. Müşârun ileyh menbaʿ-i ʿulûm-i zehhâr ve keşşâf-ı dekāyık u hakāyık-ı âsâr, râz-dân-ı mezâyây-ı menkūl ve yekke-süvâr-ı mızmâr-ı maʿkūl, sânî-yi Teftâzânî, hem-pây-i Kirmânî ve Isfehânî, tavd-ı bâzıh ve ʿilm-i şâmıh olup, Kādî üzerine taʿlîk eylediği Hâşiye'si makbûl-i tıbâʿ-ı ʿulemâ ve sâyir ʿulûmda olan tasarrufâtı, müsellem-i erbâb-ı zihn ü zekâ olduğundan fazla, Kasîde-i Bürde'ye yazdığı Türkî şerh siʿa-i ʿilm [Ü2 183b] ü fazlına bürhân ve rikkat-i şiʿr ve berâʿat-i inşâsı müstahsen-i ashâb-ı ʿirfân olup, dervîş-nihâd, halûk ve sâff-iʿtikād bir ʿâlim-i ʿâmil ve bir fâzıl-ı kâmil idi. Evâyil-i hâlinde bu Fakīr ile germ-i ülfet olup, dâyimâ mişkât-ı ʿilminden iktibâs ve tefsîr ve sâyir ʿulûmda olan muʿzılât-ı ebhâsı huzûruna ʿarz ile hall-i kazıyye vü kıyâs ve defʿ-i müşkil ü iltibâs eyleridim. Şiʿri, Tevfik Efendi'nin şiʿrine fâyik ve hatt-ı taʿlîkde akrânını sabık idi.