Dağlı eşkıyâsı üzerine Anadolu Vâlîsi Vezîr Seyyid ʿAli Paşa'nın me'mûriyyeti ve Rumeli tarafına geçdiği beyân olunmuşidi. Eşkıyâ sergerdelerinden Kara Hasan ve Kara Feyzî nâm rû-siyehler ile hevâdârları Fere Kazâsı'nda vâkiʿ Ilıcalar Karyesi'ne tehassun eyledikleri, Rumeli Vâlîsi'ne münʿakis oldukda, Silahdârı Hüseyin Ağa'yı mikdâr-ı vâfî asker ile istîsâllerine taʿyîn etmişidi. Savlet-i askere eşkıyâ tâb-âver olmayup, leylen [Ü2 179a] firâr ve Megri Kasabası'nda tehaşşüdü ihtiyâr ve bundan sonra bir hamle ile târ ü mâr olacağları mütehakkak iken, ʿAli Paşa tarafından Kara Hasan'a rây verilüp, Megri'de ikāmetine ruhsat verildiği [şâyiʿalarıyla] me'mûrların kuvvet-i bâzûlarına vehn ü fütûr îrâs edüp, Kara Hasan'dan müfârakat eden eşkıyâ dahi üç fırka oldukları ve bu esbâb ile Rumeli ve Anadolu vâlîleri miyânında nefsâniyyet hudûs ve ʿalâ mâ-hüve'l-matlûb maslahat görülmeyüp, gāyetün mâ-fî'l-bâb eşkıyânın baʿzısını Anadolu Vâlîsi itmi'nân-i kalb verüp, yanına celb ve baʿzısının Rumeli Vâlîsi rây ile vahşetlerini selb eyleyerek oldukça teskîn-i şerr eyledikleri mukarrer olmağla, müşârun ileyhimâ miyânında tekevvün eden garaz u nefsâniyyet gün-be-gün mütezâyid ve birinden sarf-ı me'mûriyyet medâr-ı teshîl-i maslahat olacağı hâtıra vârid olduğundan, ʿAli Paşa'ya rây verdiği dağluları maʿiyyetiyle Anadolu'ya geçürmek ve Rumeli tarafında kalmak murâd edenleri Mustafa Paşa tarafına göndermek üzere fermân gönderilüp, emr-i şerîfe itāʿat ve Gelibolu Maʿberi'nden ʿubûr ile mansıbına ʿavdet eyledi. Rumeli Vâlîsi Mustafa Paşa'nın bu defʻa vürûd eden tahrîrâtında [Ü1 165b] dağluya oldukça nizâm verilüp, fîmâ-baʿd cibâl kazâlarından fırka-i uhrâ zuhûr etmamek râbıtasına ihtimâm etmek içün şecâʿat ü gayreti kirâren ve mirâren meşhûd-ı enâm olan Silahdârı Hüseyin Ağa'ya Mîr-i mîrânlık ile Çirmen Sancağı verilmek, muktezây-ı maslahat olduğun işâret edüp, Çirmen'den Vezîr Kürd ʿOsmân Paşa dahi [Ü2 179b] istîfâ etmiş bulunmağla, müşârun ileyhe Tırhala ve Silahdâr-ı mûmâ ileyhe Mîr-i mîrânlık ile Çirmen Sancağı tevcîh ü ihsân olundu.