Sefâret tarîkıyle Françe'ye taʿyîn olunan ʿAli Efendi Françe sevâhilinde vâkiʿ Marsilya'ya vâsıl ve otuz altı gün Nezâret'e sıkletini çekdikden sonra, Tolun ve Lyon şehirlerinden güzâr eyleyerek iki yüz on iki Muharrem'inin on sekizinci günü Paris şehrine dâhil ve tehyi'e kılınan hâneye nâzil olup, on altı gün murûrunda tertîb olunan alay ile nâme-i hümâyûnu Müdîrân-ı Hamse'ye teslîm ve cânib-i yemînde taʿzîmen ikʿâd olunmasını Müdîrân-ı Hamse, Umûr-ı Dâhiliyye Vekîli'ne taʿlîm ve o aralıkda Ceneviz ve Papa elçileri dahi nâmelerin takdîm eyleyüp, celse-i hafîfeden sonra İspanya Elçisi, Efendi-yi mûmâ ileyhi Françe dâru'l-hükümleri olan mahalle götürüp, dâyire-i mezkûre temâşâ olunur iken, Müdîr-i Hamse o mevkıʿa vürûd ile izhâr-ı beşâşet ve baʿdehû tahsîs olunan hânesine ʿavdet eylediğini bu defʿa tahrîr ü işâret eyledi.