Müşârun ileyh ber-muktezây-ı meʾmûriyyet Edirne'den hareket ve Gelibolu'dan ʿubûr ile Haleb'e doğru ʿazîmet eyler iken, “Sögüd” nâm kasabaya gelüp, mukaddemâ ʿAlî Paşa o tarafdan [Ü1 159a] güzâr eylediğine binâʾen, fukarâ mübtelây-ı hasâr olup, kasabaya ʿadem-i duhûlü ehâlînin gāyet niyâz ü mesʾûlü olduğunu müteʿayyinân-ı kasaba inhâ ve niyâz-gûne muʿâmelelerini müşârun ileyh ruʿûnete haml ile dâmen-çîn-i istignâ olup, zûr-bâzû ile duhûl eyleyeceğini işrâb ve tekrâr ehâlî tezarruʿ u istikānetle redd-i cevâb eylediklerinden, enefe vü nahvet-i Vezâret, tehyîc-i gazab ü sevret edüp, maʿiyyetinde olan eclâf-ı askerîyi kasaba üzerine havâle ve ehâlîden birkaç âdem izâle eyleyerek kasabaya dâhil ve keyfiyyet-i tarefeyn semʿ-i devlete vâsıl olup, Hakkı Paşa'nın muhâlifleri mâddeyi iʿzâm ve hakkında tagyîr-i hâtır-ı Pâdişâh-ı enâm etmeleriyle, mesâlik ü meʿâbiri insidâdıyla fukarânın emvâl-i magsûbesi istirdâd ve kendüsi İstanköy Cezîresi'ne ibʿâd olunup, münhall olan Haleb Eyâleti, ber-vech-i ilhâk Bender Muhâfızı Hasan Paşa'ya ve üzerinde olan Mora Eyâleti, Hanya Muhâfızı Sadr-ı esbak Hasan Paşa'ya ve Hanya, Mîr-i mîrân'dan Hâfız Mehmed Paşa'ya ve üzerine olan Sultân-önü Sancağı, Trabzon Beylerbeyisi Seyyid Yûsuf Paşa'ya ve Trabzon Eyâleti, ber-vech-i ilhâk Vezîr Ziyâ Yûsuf Paşa hazretlerine ve Kilîd-bahr'da mukîm ve leyl ü nehâr müterassıd-ı merhamet-i Şehriyâr-ı heft-iklîm olan Kürd ʿOsmân Paşa'nın Vezâret'i ibkā ve Anadolu Vâlîsi Vezîr ʿAli Paşa maʿiyyetinde bulunmak üzere Çirmen Sancağı menşûru yedine iʿtâ [Ü2 172b] olunup, ʿAbdünnebî Paşa'ya dahi ʿAli Paşa bir mansıb recâ etmekle, Paşa-yı mûmâ ileyhe Resmo Sancağı tevcîh ve Benaluka'da sâkin olup, Üsküb Mutasarrıfı olan Hasan Paşa'nın ehâlî ile hüsn-i imtizâcı olmadığını Bosna Vâlîsi tahrîr [Ü1 159b] eylediğine binâ'en, Paşa-yı mûmâ ileyhin mansıbına ʿazîmeti tarafına hitâben sâdır olan emr-i ʿâlîde teʾkîd ü tenbîh olundu.