Mekke-i mükerreme Pâyesi olan Çineli Ahmed Efendi birkaç seneden berü Süleymâniye Câmiʿ-i şerîf'inde Kādî Beyzâvî Tefsîri'ni ikrâ ile iʿtiyâd ve bu hılâlde tefsîrin gāyete vusûlü şöhret bulup, duʿâda bulunup, kesb-i feyz etmek irâdesiyle bir meclis-i hâfil tertîb ü iʿdâd etmişidi. Yevm-i mezkûrda üç binden ziyâde tâlibân ders ü ifâde, câmiʿ-i şerîfde cemʿ ü îstâde oldukları hâlde, Sadrıaʿzam ve Kapudan Paşa hazerâtı dahi heyet-i mütenekkirâne [Ü2 167b] ile o meclis-i akdesde bulunup, Tefsîr-i şerîf hatmine mübâşeret ʿakabinde rûh-ı cüsmân-i ʿâlem, sebeb-i ârâmiş-i nevʿ-i benî-âdem, Pâdişâh-ı garb u şark, fârık-ı miyân-ı bâtıl u hakk hazretlerinin devâm-ı ʿömr ü şevketleri duʿâlarıyla o meclis-i hatîr tezyîn ve sadây-ı âmîn-i cemâʿat ile tâs-ı kubbe-i câmiʿ-i şerîf pür-tanîn kılınup, efendi-yi mûmâ ileyh birkaç seneden berü dersine [Ü1 155a] müdâvemetle tahsîl-i ʿulûm edenlerin on dört neferine o meclisde izin-nâme iʿtâ ve meclis intihâ bulacağı esnâda Sadrıaʿzam hazretleri tarafından bol yenlü bir sevb-i semmûr efendi-yi mûmâ ileyhe iksâ ve şemʿ-i cemʿi olan talebeye dahi bezl-i denânîr evfâ kılındı.