Rumeli Eyâleti tevcîhiyle [Ü2 165b] bundan akdem dağlı eşkıyâsına ve Rumeli nizâmına bi'l-istiklâl me'mûr olan Vezîr Hakkı Mehmed Paşa maʿlûm-ı erbâb-ı nasafet olduğu vech üzere maslahata mübâşeret ve serserî geşt ü güzâr edenleri murûr tezkireleriyle zabt ve me'âbir ü mesâliki sedd ü bend eyleyüp, barut bulunan mahalleri dahi râbıta-i haseneye rabt ile mecâmiʿ-i eşkıyâya velvele-endâz-ı heybet ü saht olmuşidi. Sülova ve Tırnova semtlerinde baʿzı eşkıyâ zuhûr eylemesi, ʿadem-i idâre-i me'mûriyyetine haml olunarak, muhâlifleri ihtilâs-ı fursat-ı güftâr ve lüzûm-ı ʿazlini işʿâr eylediklerine binâ'en, müşârun ileyh Haleb Eyâleti'ne nakl ve Rumeli Eyâleti'ne, Belgrad Muhâfızı Vezîr Mustafa Paşa vasl olunup, müşârun ileyh bir koldan ve Anadolu Vâlîsi Vezîr ʿAli Paşa dahi başında olan mecmûʿ askeriyle Haydar-paşa Sahrâsı'na gelüp, levâzımını ru'yet ve tekmîl-i maslahat ʿakabinde Rumeli tarafına tahrîk-i râyet ve ol dahi bir koldan îfây-ı me'mûriyyet eylemek ve Silistre Vâlîsi Vezîr Gürcü ʿOsmân Paşa, Niğbolu cânibinden hareket etmek, hâsılı üç koldan şiddet-i şekîme ile meşhûr üç Vezîr istîsâl-i eşkıyâya me'mûr oldular.