İşbu Şevvâlü'l-mükerremin dördüncü Sebt günü tevcîhât vukūʿ bulup, ricâl-i Bâb ʿumûmen ibkā ile ıtrâb olunup, Baş-defterdâr ve Şıkkeyn, mukarrer ile karîru'l-ʿayn ve Nişancılık, Moralı ʿOsmân Efendi'ye ve Defter Emâneti, Seyyid Mehmed Efendi'ye ve Rûznâmçe, Sultân Kethudâsı İbrâhîm Efendi'ye ve Baş-muhâsebe, bu Fakīr'e tevcîh ü ʿinâyet ve bâkī menâsıb ricâl-i devlet ve hademe-i Saltanat'a münâsibi üzere ibkā ve tevcîh olunduğundan başka, baʿzıları ʿatâyây-ı hümâyûn ile mutayyeb ü memnûn oldular. Yevm-i merkūmda vüzerây-ı ʿizâm tevcîhâtı dahi vukūʿ bulup, Bosna Eyâleti, Selânik Mutasarrıfı Silâhdâr Mustafa Paşa'ya [Ü2 165a] ve Selânik Sancağı, Hotin Muhâfızı Vezîr Ebûbekir Paşa'ya; Karaman Eyâleti, Bekmezci Mehmed Paşa'ya ve Karahisâr-ı sâhib Sancağı, Turunc-zâde Süleyman Paşa'ya; Adana Eyâleti, İsmâʿîl Kalʿası muhâfazası şartıyla Kara Mehmed Paşa'ya; Marʿaş Eyâleti, Ahıshalı Şerîf Paşa'ya; Rakka Eyâleti, Hotin muhâfazası şartıyla Hüsâmeddîn Paşa'ya; İç-il Sancağı, Mîr-i mîrân'dan Dervîş Hasan Paşa'ya tevcîh olunup, bu hılâlde Van Muhâfızı Ahmed Paşa'nın vefâtı haberi vürûd edüp, pederinin düyûnunu edâ etmek şartıyla oğlu Mehmed Bey Mîr-i mîrânlık ile Van Muhâfızı nasb olunup, Köstendil Sancağı dahi, Tâhir Paşa istiʿfâsından Kili Muhâfızı Ahmed Paşa'ya tefvîz ve Faş Muhâfızı İbrâhîm Paşa, Faş Kalʿası muhâfazasına muktedir olmayup ʿazl ve o havâlî ile münâsebet-i tâmmı olup, Burusa'da mukīm Bîcân-zâde ʿAli Paşa'ya Vezâret'i ibkāsıyla Göniye Sancağı verilüp, Faş muhâfazasına tahrîz olundu.