Venediklü'ye tâbiʿ Hırvat tâyifesi Der-saʿâdet'de ve İzmir ve sâyir iskelelerde fitne vü fesâddan hâlî olmayup, fesâdlarını defʿ ve fezâhatlerini menʿ lâzime-i umûr-ı mülkiyyeden olduğuna binâ'en, tâyife-i mezkûreden İzmir ve sâyir mahallerde mukaddemâ tevattun u teʾehhül ile temekkün edüp, olduğu memleket halkı gibi kâr u kisble meşgûl olan eşhâsdan kabûl-i raʿiyyet edenlerin mâ-ʿadâsı tard u defʿ ve tekrar ʿavdete cesaret ederi olursa sârik menzilinde ahz ve zindâna vazʿ olunmak [Ü2 164b] ve Venedik sefâyini ile gelanler müsellah gezmeyüp, bilâ-mûcib sefîneden çıkmamak ve nizâʿ ve âhar töhmet ile ahz olundukda, Venediklü olduklarına ʿadem-i iʿtibâr ile düvel-i sâyirede cârî olduğu vech üzere habs ü te'dîb olunmak ve mesfûrlardan müteʾehhil olmayanlar kabûl-i raʿiyyet ederlerse iʿtibâr olunmamak ve Rûsiyyelü'den tevattun etmiş olup, umûr-ı lâzime ruʾyeti ve yâhûd ticâret maslahatı içün Memâlik-i mahrûse iskelelerine vürûd edenler, konsoloslarında mevcûd mümzâ defterden hâric iseler katʿâ tesahhub olunmamak ve Ak-deniz'de geşt ü güzâr eden Rûsiyye sefâyininin ba'zan mellâhları o makūle eşhâsdan oldukları maʿlûm olmağla, mücerred Rûsiyyelü sefînelerinde gemicilik etmeleri münâsebeti ile Rûsiyyelü ʿadd olunmayup, ücret ile tutulmuş hademe gibi yine Venediklü iʿtibâr olunup, Rûsiyyelü tarafından istishâb olunmamak üzere Âsitâne'de mukīm elçilerine ferâde ferâde birer şukka tahrîriyle irâde-i devlet ifade olundu. [Ü1 152b]