Nemçe tarafından cânbâzlık sanʿatıyla Âsitâne'ye gelüp, baʿdehû İzmir tarafına revân olan birkaç nefer Efrenç cânbâzları İzmir'de dahi cerr-i menfaʿat sevdâsıyla ecnâs-ı muhtelifeden müctemaʿ mahlûk miyânında icrây-ı sanʿat eylediklerinde, Venedik'e tâbiʿ Zantalu'dan birkaç kâfir haddini tecavüz ile bî-edebâne harekete mütecâsir olduklarından, yasakçıların biri darb-ı ʿâsâ ile birini tehdîd ve kefereden yirmi nefer fi'l-hâl cemʿ olup, Yasakçı'yı darb-ı şedîd ile katl ve fitne tevlîd etmeleriyle, İzmir ehâlîsi tarafından kātil taleb olundukda, vermekde muhalefet ve giderek muhâvereleri mü'eddî-yi husûmet olup, tarefeynden vâfir nüfûs zâyiʿ ve o aralıkda şehrin içinde ihrâk vâkiʿ olup, vâfir emvâl ü eşyâ magsûb-i eyâdî-yi eşkıyâ olduğu haberleri bâ-mahzar u iʿlâm inhâ olunmağla, fitneyi teskîn zımnında asker-i vâfî [Ü2 164a] ile Aydın Muhassılı Kara ʿOsmân-zâde taʿyîn ve Dergâh-ı ʿâlî kapucu-başılarından ʿAbdullah Bey ve Ocağ-ı ʿâmire tarafından bi'l-fiʿl Zağarcı-başı el-Hâc Mehmed Ağa Mübâşir nasb olunup, harc-ı râhları dahi bu tarafda verilüp, maslahatları tehvîn ve yedlerine verilan emr-i ʿâlîde Yasakçı'nın kātili Venedik Konsolosu'ndan ahz ve cezâsı tertîb ve İslâm ve reʿâyânın emvâlini gasb edenler buldurulup istirdâd ve ashâbına teslîm ve muharrik-i fesâd kimler ise lede't-tahkīk zâbitleri maʿrifetleriyle takyîd ü tevsîk ve bu tarafa ʿarz olunup, ne vechile irâde teʿalluk ederse o vechile icrây-ı mâ-yelîk olunmak ve emvâl-i magsûbe ile maznûn olup, vakʿadan sonra Yeni-kalʿa'dan murûrları tecvîz olunmayan sefîneler İzmir Lîmânı'nda tevkīf ve celiyye-i hâl tekşîf [Ü1 152a] olunup, emvâl-i magsûbe bulunduğu hâlde ashâbına istirdâd ü edâ ve müsteʾmen tâyifesinin dahi gasb olunmuş şeyleri var ise derhal hârice ihrâc u iʿtâ ve fîmâ-baʿd o tarafda nizâʿ vukūʿ bulmamak esbâbını tedârük ü istihsâl ile nizâm-ı beldeye ikdâm olunmak tenbîhâtı tavsiye vü ifhâm olundu.