"Müstegallâtı kurâ ve mezâriʿ olan evkāfdan cihet ihdâsı câyizdir” mes'elesine teşebbüs ile baʿzı evkāfda tamʿan vezâyif tertîb ve ol bâbda nâzırlar ʿarz ve evkāf müfettişleri hüccet ü iʿlâm iʿtâsıyla aklâma kayd olunarak, hılâf-ı şurût-ı vakfiyye niçe cihât ihdâs [Ü2 163a] olunduğundan başka, ʿimâreti olan evkāfda mütevellîler tarafdarlarına tezkireler ile müceddeden fodula taʿyîn edüp, vakfın masrafını müzdâd ve nass-ı Şâriʿ hükmünde olan şart-ı vakıfı berbâd etmeleriyle, baʿde-ezîn Sadrıaʿzam ve Şeyhülislâm ve Dâru's-saʿâde Ağası hazerâtı ve Bâbü's-saʿâde ve Serây-ı hümâyûn ağaları ve İstanbul Kadısı [Ü1 151a] ve Bostâncı-başı nezâretlerinde ve Âsitâne ve taşrada vâkiʿ sâyir nezâretlerde ve nezâretli ve nezâretsiz Âsitâne'de ve taşrada kebîr ü sagīr cemîʿ evkāf-ı şerîfede hılâf-ı şart-ı vâkıf ve bilâ-hatt-ı hümâyûn muhdes vakfiye ihdâs olunmamak ve ihdâsı muktezî oldukda, yalnız fermân-ı ʿâlî ve Nâzır ʿarzı ve işâret-i ʿaliyye ve müfettişler taraflarından ve sâyir mehâkimden ber-vech-i muharrer “Müstegallâtdan ihdâs-ı cihât câyizdir” deyerek verilan hüccet ü iʿlâm ile tanzîm olunmayup, o makūle senedât aklâma vardıkda, kaleminden ʿadem-i kabûl ile hatt-ı hümâyûna mevkūf olduğu ibrâz olunan sened meʿâli ile der-kenâr olunmak ve bilâ-hatt-ı hümâyûn bâlâsına musahhah fermân yazılmış ʿarz ve işaret ve iʿlâm ü hüccetle kaleminden muhdes vazîfe tezkiresi verilmek lâzım gelürse, kalemin hâcesi muʿâhaze ve Kîsedâr ve hulefâsının elleri katʿıyla sâyire ʿibret kılınmak ve ʿimâreti olan evkāfda müceddeden Mütevellî tezkiresi ve fermân ve Nâzır arzı ve işaret ve sâyir vechile müceddeden fodula tertîb olunmamak ve cemîʿ evkāf-ı şerîfede muhdes vazîfe ve fodula istidʿâsıyla, Bâb-ı ʿâlî'ye ʿarz u işâret ve yâhûd ʿarz-ı hâl takdîm ve sehven ve ʿamden bâ-fermân iʿlâma havâle olundukda, [Ü2 163b] memnûʿiyyeti ve hatt-ı hümâyûna muhtâc idüği tahrîr ve sahibine redd olunmak ve bu sûret-i hasene evkāfın ʿimârına sebeb olacağı mübarek Rikâb-ı kâm-yâb'a ʿarz olundukda, takrîr mûcebince ʿamel olunmak bâbında mufassal hatt-ı hümâyûn-ı mevhibet-makrûn şeref-rîz-i sudûr olmağla, hatt-ı hümâyûn ve sûret-i nizâm Başmuhasebe'ye kayd olunup, sâyir aklâm ve nüzarâ’-i evkāf ve müfettişîn ve mehâkim-i Bilâd-ı selâse ve Rûznâmçe-i Askerî ve sâyir lâzım gelan mahallere ʿilm ü haberleri iʿtâ ve Memâlik-i mahrûse'nin cemîʿ mehâkimine kayd olunmak içün [Ü1 151b] Anadolu ve Rumeli'nin üçer kollarına evâmir-i şerîfe isrâ olundu.