[Ü2 152a] Galata'dan maʿzûl ve Edirne Pâyesi'ne mevsûl olan Çineli Madrûbî Ahmed Efendi ve Mehmed Emîn Beyefendi'nin munfasıl oldukları mansıb ve mutasarrıf oldukları pâyede farkları olmayup, Ahmed Efendi, Ders-i ʿâmm ve Emîn Beyefendi hüner ü kemâlde pesendîde-i hâss u ʿâmm olup, bu makūlelere tarîkçe ikrâm, muktezây-ı şîme-i Şehriyâr-ı enâm olduğuna binâ'en, Ahmed Efendi'ye şehr-i mezkûrun onuncu gününden ve Emîn Bey'e on üçüncü gününden iʿtibâr ile Mekke-i mükerreme Pâyesi verilüp, ikisi dahi merâmlarıyla şâd-kâm kılındı. Ve baʿzı mevleviyyetlerin zemân-ı tevcîhi tekarrüb ve şimdiden erbâbı te'ehhüb etmek lâzım geldiğinden, on bir senesi Şevvâl'i gurresinden zabt ve 'azli, nasbı târîhinden mu'teber olmak üzere Kazây-ı Edirne, İzmir'den maʿzûl Kebîrî-zâde es-Seyyid ʿAbdurrahmân Efendi'ye ve gurre-i Ramazân'dan zabt etmek üzere Burusa Kazâsı, Havâss-ı refî'a'dan munfasıl Fahreddîn Efendi'ye ve gurre-i Receb'den zabt etmek üzere Selânik Kazâsı, bâ-Pâye-i Edirne Fetvâ Emîni Ahmed Efendi'ye ve iki yüz on iki senesi Rebîʿulevvel'i gurresinden zabt etmek üzere İzmir Kazâsı, Samakovî-zâde Ahmed Necîb Efendi'ye tevcîh olundu.