Trablusşâm Vâlîsi olan Vezîr Mûsâ Paşa, ol havâlîde mukaddemâ tahsîl-i emvâl ve sâyir me'mûriyyetle iştigāl sebebi ile Cerde Başbûğluğu'na heveskâr ve emvâl-i mîrîyi vaktiyle edâ ve Cerde hidmetini kemâ-yenbâgī îfâ etmek şartıyla Rütbe-i vâlâ-yı Vezâret'e sezâvâr ve Trablusşâm Eyâleti ile kâm-kâr olmuşidi. Bu âna dek mâl-ı mîrîyi edâ ve teʿahhüdüne vefâ eylemediğinden başka, tamaʿ u irtikâb ile bu taraflarda şöhret-yâb ve giderek bu mu'âmele-i nâ-hencârı evliyây-ı devleti igzâb edüp, Mîrü'l-Hâcc Paşa dahi oğlu Halîl Bey'e Trablus Eyâleti Mîr-i mîrânlık ile ihsân olunduğu hâlde, kâffe-i umûrda rızây-ı devlete muvâfık harekât izhârını [Ü1 141a] teʿahhüd eylediğine binâ'en, işbu şehr-i Rebîʿulâhır'ın onuncu günü müşârun ileyh ʿazl ve İstanköy Cezîresi'ne tagrîb ve emvâl ü eşyâsı cânib-i mîrîden zabt ile hakkında icrây-ı lâzime-i teʼdîb kılınup, Cerde Başbûğluğu ve Trablus Beylerbeyiliği ber-minvâl-i muharrer Halîl Bey'e tevcîh ü ihsân ve fetîle-i çerâğ-ı ikbâli, misbâh-ı münîr-i iltifât-ı Cihân-bânî ile fürûzân kılındı.