[Ü1 141b] Müşârun ileyhin müfredât-ı ahvâli mahallerinde kalem-i ʿÂcizânem ile tafsîl olunup, nev-be-nev hubs-i serîretinden ser-zede olan reftâr-ı nâ-hemvârı müstağnî-yi i'âde vü tekrâr olmağla, fakat ʿâlem-i vücûddan ne vechile mefkūd olduğu beyânıyla iktifâ olundu. Müşârun ileyh nevʿammâ Devlet-i ʿaliyye tarafından mutma'inn [Ü2 152b] olup, etrâfında vâkiʿ usât-ı küffâr ile muʿtâdı üzere âheng-i ceng ve âzmâyiş-i tîğ ü tüfeng etmek kasdıyla, işbu Muharremü'l-harâmda yerinden hareket ve İşpoz [Spuz] ve Podgorica mukābilinde vâkiʿ Pirol ve Pars yurdlarında mütemekkin küffâr üzerine hücûm edüp, münhezimen ʿavdet eylediği hînde telâfî-yi mâ-fât niyyeti ile tekrâr tedârük görüp, asker-i kesîr ile ʿusât-ı merkūme üzerine ʿazîmet etmişidi. Küffâr, hem-civârları olan Karadağ eşrârından ittihâd-ı âyîn hasebiyle istimdâd ve anlar dahi cemʿ-i kesîr ile imdâd ve iki fırka birbiriyle iʿtizâd eyleyerek “ez-Zaʿîfâni yağlibâni kaviyyā” mefhûmu üzere İskenderiyye askerine galebe eylediklerinden gayri, esnây-ı muhârebede müşârun ileyh dahi iki yerinden zahm-nâk ve te'sîr-i cerhden helâk olduğu haberi Der-i devlet-medâr'a vârid oldu. “Lillâhi derru'l-leyâlî fî tasarrufihâ, mâzâ türînâ mine'l-âyâti ve'l-ʿiber” Mîr-i mîrân'dan birâderi İbrâhîm Paşa İskenderiyye'nin kendüye ihsân olunması niyâzıyla etrâf u eknâfa neşr-i evrâk ve etrâf dahi iktizây-ı hâl sebebi ile evleviyyet-i müsâʿadede ittifâk eylediklerinden gayri, mûmâ ileyhin Devlet-i ebed-müddet'e meyl ü rükûnu etvâr-ı sâbıkasından istidlâl ve İskenderiyye vakʿasında birâderi müteveffâya incizâb ü ittisâli, havf-ı cân ile baʿzı vesveseye zehâbından ve asker-i meʾmûr beyninde tekevvün eden şikāk u nifâk hasebiyle maslahatın görülmeyeceği [Ü1 142a] ihtimâlinden lâzım geldiği zâhir-i hâl olmağla, bu esbâb imâle-i kulûb-ı uli'l-elbâb edüp, o hılâlde İskenderiyye Müftîsi [Ü2 153a] dahi gelmiş bulunmağla, müteveffânın deyn-i mîrîsi ve İskenderiyye tevcîhinin ʿivazı, hadd-i iʿtidâl üzere müzâkere olunup, ol mikdâr meblağı nakden ve nesʾeten vermeğe teʿahhüd eylediklerinden, İskenderiyye Sancağı, Rumeli Beylerbeyiliği Pâyesi'yle İbrâhîm Paşa'ya ve İlbasan Sancağı, mûmâ ileyhin iltimâsıyla Mîr-i mîrân'dan yeğeni Mehmed Paşa'ya tevcîh olundu.