Sadrıaʿzam hazretleri baʿzı esbâba mebnî mûmâ ileyhden rû-tâb-ı nefret ve bir cihetle mütekeddir olması bâbında nigeh-dâr-ı fursat olmuşidi. Mûmâ ileyh ʿiffetlü Beyhân Sultân hazretlerine Kethudâ bulunup, o esnâda baʿzı dâd ü sitede dâ'ir su'âl ü cevâb vukūʿunu Sadrıaʿzam ganîmet ʿaddiyle nihânî ʿazlini ilkā ve gars-ı yemîni olan ʿAzîz Efendi'nin Kethudâlığı'nı iğrâ ile ru’yet-i hisâbda fâyide tehakkukunu inbâ ve müşârun ileyhâ hazretleri dahi ʿazlini istidʿâ buyurmuşlar idi. Fi'l-hâl ʿazl olunup, ru'yet-i hisâb ile bir mikdâr şey istirdâd ve şehr-i mezkûrun on yedinci günü [Ü2 150b] Burusa'ya nefy ü ibʿâd olunup, Kethudâlık husûsu şevher-i saʿd-ahterleri Vezîr Silahdâr Mustafa Paşa'nın taʿyîn ü tahyîrine vâbeste olmak irâdesiyle müşârun ileyhe haber firistâde olundukda, hâlâ Büyük Tezkireci Mehmed ʿÂrif Efendi'nin müşârun ileyhâya Kethudâ olması husûsu, o tarafdan beyân ü ifâde olunmağla, tertîb olunan mukaddime lağv olup, müşârun ileyhâ hazretlerinin Kethudâlığı ʿÂrif Efendi'de istikrâr ve fi'l-hâl ilbâs-ı hilʿatle mûmâ ileyh rehîn-i istibşâr olup, ʿAbdullah Efendi'nin üzerinde bulunan mansıb-ı Tevkīʿî, Şerbetçi-zâde dâmâdı Emîn Efendi'ye tevcîh olundu.