Hanya Sancağı Mutasarrıfı Ferhâd Paşa dâhil-i silk-i vüzerâ olduğu [Ü1 140a] günden berü kesîrü'l-cedvâ bir mansıb ile kâm-revâ olmadığından, ıztırâb-ı hâle dûçâr ve Kandiye'nin kendüye ihsân olunması bâbında dest-güşây-ı temennî vü iftikār olup, hâlâ Kandiye Muhâfızı Sadr-ı esbak Hasan Paşa üç sene kadar Kandiye'de ikâmet ile kesb-i refâhiyyet edüp, mübâdele-i mansıblarında dahi şurûta muvâfakat bulunmağla, şehr-i mezkûrun on yedinci günü Kandiye, Ferhâd Paşa'ya ve Hanya, Hasan Paşa'ya tevcîh ve Seyyid ʿOsmân Paşa'nın el-yevm mutasarrıf olduğu Niğde Sancağı'nın ekser kazâları Bereketlü Maʿdeni'ne merbût olup, bâkī kalan kazâlar, dâyiresine mütehammil olmadığı zâhir olmağla; Niğde'yi, Mütesellim'i ve İç-il'i, bi'n-nefs kendüsi zabt etmek şartıyla müşârun ileyhe şehr-i mezkûrun yirmi beşinci günü İç-il Sancağı [Ü2 151a] ber-vech-i ilhâk ʿinâyet ve hakkında icrây-ı lâzime-i şefekat olundu.