Korsan tekneleri ile bundan akdem Ak-deniz'e [Ü2 149b] me'mûr olan İnce Mehmed ve Bekîr Çavuş, deryâda geşt ü güzâr eyleyerek Girid Cezîresi'nde vâkiʿ Gavdos açıklarında yirmi altı pâre topçeker otuz beş zirâʿ bir kıtʿa Malta şehtiyyesine râst gelmeleriyle, sekiz sâʿat ceng [Ü1 139a] ü peykâr ve fazl-ı Kahhâr ile şehtiyye mazbût-ı asker-i Pâdişâh-ı cemîlü'l-âsâr olup, derûnunda olan otuz iki nefer ehl-i İslâm ve iki nefer zen-i siyeh-endâm kayd-ı esrden reh-yâb-ı selâmet ve doksan bir Maltiz keferesi mukayyed-i selâsel-i hârî vü mezellet olup, sefîne ve üserâ Midilli'de ikāmet üzere Kapudan Paşa tarafına baʿs ü isrâ olunduğu hılâlde, mûmâ ileyhimâ Derne sularına açılup, “Porta Tomruk” nâm mahalde on sekiz topçeker bir kıtʿa korsan sefînesine dahi tesâdüf ve bi'l-muhârebe anı dahi zabt ve derûnunda bulunan iki nefer Tenenti ve iki nefer Kavalyer nâmında sergerdeler ile yüz nefer Maltiz keferesini habl-i esre rabt ve bu sefînede dahi ehl-i İslâm'dan iki nefer zen ve on altı nefer merd tahlîs olunup, takımıyla yine müşârun ileyh hazretleri tarafına irsâl eyledikleri haberi Âsitâne-i saʿâdet'e ferhat-res-i vürûd ve bâʿis-i tahsîn ü dürûd olup, Kapudan Paşa dahi ʿavdete me'zûn bulunmuş olmağla, işbu Rebîʿulevvel'in yedinci İsneyn günü ʿadûy-ı dînden darb-ı dest-i mücâhidîn ile ahz olunan sefîneleri menkûsü'l-livâ, nazar-gâh-ı hazret-i Tâcdârî'den imrâr ve Donanma-yı hümâyûn'u dahi mersây-ı Tersâne'ye rabt ile meşkûru'l-hıdme merkezinde [Ü2 150a] karâr eyledi.