Bir müddetden berü Anapa Muhâfızı olan Moralı es-Seyyid Mustafa Paşa İslâmı'nı setr eder iʿtikādıyla kefereden bir meczûba ʿinân-ı idâre vü tasarrufunu teslîm ve her ne derse kelâmına mutâvaʿat ü inkıyâdı sevâb-ı ʿazîm ʿadd eylediği, derece-i tevâtüre resîde olup, Devlet-i ʿaliyye tarafından birkaç defʿa menʿ ü inzâr sûretinde muʿâmeleler izhâr olunmuşiken, mücâb ü mülzem olmayup, Anapa ehâlîsi miyânında dahi güf ü gû hâdis ve bi'l-külliyye zevâl-i nüfûzuna bâʿis olmağla, müşârun ileyh Anapa'dan ʿazl ve Sinob'a çıkdığı tahkīk olundukda, muʿtekadı olan kâfir katl olunup, Kütahya Mütesellimi bulunan Melek Ahmed Paşa-zâde ʿOsmân Paşa'nın şimdiye dek mutasarrıf olduğu mansıblarda hüsn-i sülûku mücerreb ve her hâlde evzâʿ ü etvârı mühezzeb olduğuna binâ'en, hakkında ʿinâyet-i hazret-i Cihân-bânî erzânî ve işbu Rebîʿulevvel'in dokuzuncu günü Rütbe-i Vezâret ile pâ-nihâde-i mesned-i kâm-rânî ve Anapa Kalʿası muhâfazası şartıyla Ankara ve Kayseriyye sancakları te'bîden tarafına tevcîh ve Hazîne-i hümâyûn'dan yüz bin guruş ile dâiresi tevsîʿ ve hâli terfîh olunup, kabâyil ü ʿaşâyire mahallinde iʿtâ ve taksîm olunmak üzere bu defʿa tehyi'e olunan inʿâmât-ı Şâhâne dahi yedine teslîm olundu.