Re'îsülküttâb olan Râtıb Ebûbekir Efendi tercemesinde musarrah esbâb ile işbu Muharrem'in on dördüncü Çehârşenbih günü ʿazl olunup, sâbıkā Defter Emîni olan Râsih Mustafa Efendi Riyâset-i Küttâb ile kâm-yâb ve üzerinde olan Eyâlet Defteri Nezâreti, Re'îsülküttâb-ı esbak Firdevsî Efendi'ye tefvîz olunmak istısvâb ve Dîvân Tercemânı olan Yorgaki, me'mûriyyetinden hâric umûr ile ihtilât ve baʿzı mahallerde istinâd ü irtibât ile evliyây-ı devleti her hâlde iğzâb ü ishât etmiş olduğuna binâʾen, ol dahi ʿazl ile misâl-i sıfr-ı zâyid iskāt olunup, birâderi Eflâk Voyvodası'nın rızây-ı devlete muvâfık her ne kadar hidmeti meşhûd ise anın dahi tarden li'l-bâb ʿazli îcâb edüp, İpsilanti Aleksandra Eflâk Voyvodalığı'na ve oğlu Kostantin Dîvân Tercemânlığı'na intihâb olundu. Râtıb Efendi'nin mûcib-i ʿazli olan mâdde giderek teverrüm ü teşennüc ve hakkında âteş-i gayz tevakkud ü tevehhüc edüp, ʿazlinden birkaç gün sonra Rodos Cezîresi'ne iclâ ve dâyiresine mütereddid bulunanlardan Amasyalı Müderris Hâşim Efendi ve Silahdâr Kalemi Baş-halîfesi Mestân Efendi, Hanya'ya ve Müsteşârı olan tercemân-ı mesfûr, Kıbrıs'a bi-tarîkı'n-nefy isrâ olunup, mesfûrun [Ü2 149a] cünhası ʿafv olunur [Ü1 138b] makūleden olmadığına binâʾen, emr-i hümâyûn ile Kapudan Paşa hazretleri maʿrifetiyle iʿdâm ve tahvîf-i hadd-i nâ-şinâsân-ı ervâm kılındı.