Bir müddetden berü Rumeli taraflarında şekāvetle şöhret-yâb olan [Ü1 137b] Sinab'ın mütehassın olduğu kullesi Rumeli Vâlîsi tarafından me'mûr Kocaeli Sancağı Mutasarrıfı Hüseyin Paşa ma'rifetiyle mahsûr kılınmışidi. Şakī-yi mezkûr râh-ı necâtdan me'yûs ve birkaç nefer şahs-ı menhûs ile leylen kullesinden çıkup, balkāna doğru firâr ve meʿâbir ü mesâlikin mukaddemce insidâdı hasebiyle girîz-gâh zann eylediği mahallerin birinden murûr ederken, [Ü2 148a] istâde-i rasad-gâh-ı intizâr olan gümâştegân-ı devlete tesadüf ile nâ-çâr muhârebeye ibtidâr ve yek-hamleye tâkat getüremeyüp, istishâb eylediği eşkıyânın bir mikdârı katîl ve kendüsi dahi cerîh ü zelîl, gûyây-ı “Eyne's-sebîl!" olmuşidi. Fi'l-hâl me'mûrân-ı devlet eşkıyây-ı mezkûreyi ta'kīb ve Sinâb ve hevâdârlarından yirmi şakīnin cezâlarını tertîb eyledikleri haberi müşârun ileyh tarafından ru'ûs-i maktūʿalarıyla Âsitâne'ye vâsıl ve matrûh-ı ʿibret-gâh-ı erâzil oldu.