Selânik Sancağı'nda vâkiʿ Vodina ve civârında olan [Ü2 147b] kazâlarda beş-altı seneden berü üç yüz kadar eşkıyâ gasb-i emvâl ve sefk-i dimâ edegeldikleri, iʿlâmât ve mehâzır ile Selânik Mutasarrıfı Vezîr Silâhdâr Mustafa Paşa'ya inhâ olunduğuna binâ'en, müşârun ileyh tarafından asker taʿyîn olunup, mütehassın oldukları cibâlde pâ-ber-cây-ı ‘inâd u muhâlefet ve 'âkıbet zûr-bâzû-yı merdân ile rû-be-râh-ı vâdî-yi hezîmet olmuşlar idi. Birkaç günden sonra zikr olunan eşkıyâ bir mahalle ictimâʿ edüp, sedd-i etrâf u enhâ ile mel'anet-i sâbıkaların icrâ eyledikleri tahkīk olunup, keyfiyyet-i mezkûre derbendler dâhilinde vâkiʿ olmak mülâbesesiyle Başbûğ'u olan Tepedelenli ‘Ali Paşa'ya tahrîr ve ol dahi Silâhdârı'nı taʿyîn ü tesyîr edüp, iki tarafın askeri ihtişâd ve yek-laht-ı ittihâd olarak Karaferye ile Vodina beyninde vâkiʿ “Kara-taş” nâm mahalde nâyire-i ceng îkād olunup, eşkıyâ rû-gerdân ve otuz neferi hâk-i mezellete galtân olduğunu müşârun ileyh inhâ ve gönderdiği ru'ûs-i menhûse Serây meydânına ilkā olundu.