Çıldır Vâlîsi Vezîr Mehmed Paşa'da, Kapu Kethudâsı Süfyân Ağa'nın küllî alacağı olup, edâda mümâtale üzere olduğunu ifâde ve tahsîli bâbında dest-i niyâzı küşâde edüp, taraf-ı Sadâret-penâhî'den edây-ı deyn eylemesiyçün birkaç defʻa mekâtîb-i seniyye firistâde olunmuşiken, ‘adem-i müsâʿade-i vakt ü zemâne ile îrâd-ı ‘özr ü behâne eylediğinden gayri, Ağa Mehmed Hân'ın savletinden hazer ile Çıldır tarafına firâr eden Tiflîs reʿâyâsını seby ü istirkāk ve dâru'l-emn olan memâlik-i Pâdişâhî'ye ilticâ eden o makūle derd-mendânı mahrûm-ı rûy-i mürüvvet ü işfâk edüp, ‘ale'l-husûs Tiflîs Hânı'nın Moskovlu ile nihânî ‘ahd ü peymânı olup, bu keyfiyyeti o tarafa inhâ ile ‘azlini isti‘dâ etdirecekleri hüveydâ olmağla, Moskovlu tarafından müşârun ileyhin 'azline dâyir kīl u kāl [Ü1 137a] zuhûrundan evvel mansıbı eyâlet-i uhrâya mübeddel kılınması, müstasveb-i erbâb-ı ‘akd ü hall olduğuna binâ'en, şehr-i mezkûrun on beşinci günü Çıldır Eyâleti, Erzurum Vâlîsi Vezîr Ziyâ Yûsuf Paşa hazretlerine ilhâkan tevcîh ve Adana Eyâleti, müşârun ileyh Şerîf Paşa'ya tefvîz ile o taraflardan tebʿîd ü tenzîh olunup, Adana Beylerbeyisi ve İsmâʿîl Muhâfızı olan İsmâʿîl Paşa'ya hâline çespân bir mansıb vukūʿuna dek beher mâh bin altı yüz yirmi beşer guruş mîrîden iʿtâ olunması fermân buyuruldu.