Kara-deniz Boğazı'na ecnebî beylik sefînesi vürûdunda ibtidâ top atılup, girmeğe ısrâr etdiği sûretde iğrâk olunmak husûsu, eğerçi ihtisâr üzere bâlâda işʿâr olunmuşidi. Ancak bu defʿa Moskovlu'nun bir kıtʿa beylik kalyonu muhâlif-i hevâ ile Boğaz'a düşüp, bu mâddenin taʿlîm-nâmede beyânı ve Moskovlu'ya ihbâr u iʿlânı lâzım geldiğinden, ber-vech-i âtî beyâna şurûʿ [Ü1 133a] olunur ki, gice ile ecânib tarafından sefâyine dâ'ir sevâd zuhûr ederse, mukaddemâ beyân olunduğu üzere her bir kalʿadan nevbetcileri birbirlerine barut kaldırup ve birkaç defʿa fişeng ile işâret etdiklerinden sonra, heman o vakit fenar kalʿalarında fetîl der-dest hâzır bulunup, o makūle sefâyin geçmek murâd ederler ise, evvel emirde ancak kalʿateyn-i merkūmeteynden zuhûr eden sefînenin baş tarafından ilerüce ve kıçından gerüce birer top atılup, bundan sonra dahi tevakkuf etmeyüp, murûr dâʿiyesinde olup, berülerde olan kılâʿ pîşgâhına gelür ise, berü kalʿalardan dahi birer top atılup, sefîne-i merkūmeyi kalʿalar arasında demürletdikden sonra, hâlini teharrî ve ne makūle sefîne olduğunu tahkīk ve nâzırları keyfiyyeti derhal Tersâne-i ʿâmire'ye ihbâr ede. Ve eğer Boğaz'dan duhûlü [Ü2 143a] istîzâna muhtâc olan o misillü ecânib beylik sefînesi bu vechile kılâʿ-ı merkūmeden top atılmasıyla menʿi murâd olunumuşiken, yine murûrda ısrâr eyler ise, sefîne üzerine top atılup, iğrâk oluna. Ve eğer murûr etmeyüp, kalʿalar arasında ve yâhûd Kara-taş altında ârâm ederse, yine bir dürlü gaflet câyiz olmayup, fetîl der-dest hâzır u müheyyâ bulunmağa dikkat ile teyakkuz u intibâh merâsimine riʿâyet oluna. Ve bilâ-izn bu misillü ecânib beylik sefînesi bağteten gündüz zuhûr ederse, yine başından ilerüce ve kıçından gerüce top endâhtıyla tevkīf ve kalʿa arasında demürlendirmesine ikdâm oluna. Ve Boğaz'dan duhûlü istîzâna tevakkuf eden ecânib beylik sefînelerinden biri, muhâlif-i hevâ ile zarûrî Boğaz'dan içerü duhûl eyler ise, eyyâm-ı sayfda Kara-taş altı ve eyyâm-ı şitâda kavaklar arası demür yeri olup, her ne kadar şedîd rûzgâr olursa, bu iki mahalde demür-pâydâr olacağı [Ü1 133b] âşikâr olmağla, o makūle ecânib beylik sefînesi Boğaz'a geldikde, yaz eyyâmında Kara-taş altına ve kış eyyâmında kavaklar arasına demürlendirilüp, tecâvüz etdirilmeye. İşbu nizâm taʿlîm-nâmeye derc olundukdan sonra, Moskov Elçisi'ne dahi meʾâl-i nizâm ifade olunup, şimdiden sefîneleri ruʾesâsına tenbîh olunmak irâdesi beyân olundukda, mesfûr keyfiyyeti devletine ifade edüp, anlar dahi bu nizâmın icrâsına dikkat olunmasını iktizâ edenlere tenbîh eylediklerini [Ü2 143b] şâmil Bâb-ı ʿâlî'ye memhûr takrîr göndermekle, takrîr-i mezkûr tercemesiyle Dîvân Kalemi'nde hifz olundu.