ʿArabacı Ocağı beş orta iʿtibâr olunmuş olmağla, [Ü1 104a] her ortaya dört Marankoz ve iki Çilingîr ve iki Serrâc ve dört nefer Naʿlbend tertîb olundukda, bir ortaya iki nefer iktizâ etmekle, bu vechile beş ortaya altmış nefer tertîb olunmuş olup, bunlar el-yevm otuz beş-kırk pâre ücret ile iʿmâl olunmakda olmağla, san'atlarında mâhir olanlardan bi'l-imtihân intihâb olunarak, Nâzır olan Mustafa Reşîd Efendi ve ʿArabacı-başı ve Kâtibi ve zâbitân-ı sâyire maʿrifetleriyle yevmiyye altmışar akça ile altmış nefer tahrîr ve beş ortaya taksîm ve ortanın neferât-ı sâyiresi gibi taʿyînât tertîb olunmak ve bunlara altmışar akça yevmiyye verilmesi seferde ortalarıyla temâmen bulunmak içün olmağla, hazarda dahi biri kâr-hâneden münfekk olmamak ve Ocağ'ın hıdmeti var ise görüp, iʿmâl olundukları gün yevmiyyeleri olan altmış akçanın üzerine râyic-i vakt ne ise zamm u iblâğ olunmak ve işsiz vakitlerde bunların taşrada işlemesi tecvîz [Ü2 111a] olunmayup, dâhil-i kâr-hânede kârlariyçün işlemeleri câyiz ola. Ve mahlûlleri vukūʿunda yevmiyyeleri nâ-ehle geçmamek içün Nâzır ve zâbitân huzûrunda bi'l-imtihân mahlûl-i mezkûr erbâbına verilmek ve hazarda ʿulûfe alup, sefere gitmeyen ve yâhûd firâr eden olursa, hazarda aldığı ʿulûfe temâmen redd ve te'dîbi icrâ olunmak ve iş vakti yevmiyyesinden ziyâde akça verilmek mâddesi Serrâc ve Marankoz ve Çilingîr'e münhasır olup, Naʿlbend müstesnâ olmak ve bunların cümlesi ehl-i İslâm'dan olmak şart olmayup, ehl-i zimmetden olması dahi câyiz olmak mâddesi ber-vech-i muharrer tezyîl ve ʿArabacı Ocağı'nın dahi şurût-ı kānûniyyesi bu vechile tekmîl olundu.