Top-hâne-i ʿâmire'nin neferât ve mevâcibi ber-muktezây-ı kānûn-i cedîd tesviye olunup ve serhadlere me'mûr Topçuyân mevâcibinin dahi bi'l-istisnâ şerâ'it-i vesîkaya rabtı lâzım gelmekle, binâ-berîn baʿde-ezîn serhadler mevâcibine Ocak tarafından müdâhale olunmayup, mevcûd ve nâ-mevcûdları bilindikden sonra, beher sene mevcûdlarının mevâcibi kurb-i serhadde vâkiʿ emvâl-i mîriyyeden havâle olunmak ve Ocak müdâhalesi ber-taraf olmak içün yerlü neferâtı gibi [Ü1 94b] beher sene Der-saʿâdet'e sâlyânecileri gelüp, mevâciblerini mutâlebe ve kaleminden kayıdlarına mürâcaʿat ve baʿde'l-hisâb havâle senedâtı öteden gelan sâlyânecilerine verilüp, maʿrifetleriyle yerlerinden tahsîl ve doğru mahallerine götürüp, zâbitleri maʿrifetleriyle neferâta tevzîʿ ü taksîm olunmak ve Topçu Ocağı'ndan bi'l-külliyye râbıtaları münkatıʿ olmamak içün serhad sâlyânecilerinin biri geldikde, Nâzır ve Ağa'nın bi'l-iştirâk memhûr takrîrleriyle fekat vürûdları ihbâr u inhâ olunmak ve serhad topçubaşılarının tevcîhâtı ancak Nâzır'ın iʿlâmına mevkūf olup, Topçubaşı bulunanlar ʿazl ü nasblarına müdâhale etmeyeler. [Ü2 101a] Ve kānûn-nâmede zikr olunduğu vechile Ocağ'ın cemîʿ umûru Nâzır'dan ve zabt-ı neferât Ocak Ağası'ndan mes'ûl olmağla, serhadlerde olan topçulardan kabâhat yâhûd hukūka dâ'ir daʿvâ zuhûruyla Mübâşir taʿyîni lâzım geldikde, Top-hâne Ocağı'ndan gönderilmek ve serhadlarde olan topçularara bir senelik mevâcib irsâliyle Devlet-i ʿaliyye'den yoklanmaları lâzım gelmekle, bu sûretde kılâʿ muhafazasında Topçu neferâtının bir senelik mevâcibleri nakden irsâl birle Yoklamacı gidüp, beher sene mevâcibleri civârda olan emvâlden Ocaklık misillü tahsîl olunacağını ifâde ile mevcûdlarını sıhhati üzere defter edüp, takdîm ederler ise fe-bihâ, etmeyüp nâ-mevcûdu ihfâ ve kemâ-fi's-sâbık tâmm mevâcib mutâlebesinde ısrâr-ı gûne muʿâmeleleri hüveydâ olursa, bîhûde emvâl-i mîrî telefinin maʿnâsı olmayup, kadîmi gibi üç-beş senede yedlerine mevâcib vusûl bulduğu gibi, Ocak ifrâzı ve sâyir mesârıfı ibkā olunarak bi-tayyi'l-husûl emvâlden [Ü1 95a] mevâcibleri tertîb olunmak tasvîb olunup, şimdiye dek gerek Topçu ve gerek ʿArabacı ocağlarına serhadler mevâcibi içün verilan havâlât kuyûdu ihrâc ve sâlyânecilerinin yedlerinde mevcûd akça ve sebeb-i tahrîr ahkâmı mîriden ahz ve yevmiyyeleri ru’yet olunmak ve ol bâbda şeref-rîz-i sudûr olan hatt-ı hümâyûn mûcebince serhadlerde olan Topçu ve ʿArabacı neferâtının ber-muktezây-ı Nizâm-ı Cedîd gayr ez-ifrâzât, Ocak ve mesârıfât-ı sâyire bir senelik mevâcibleri nakden taraf-ı devletden muʿtemed Mübâşir ile gönderilüp, noksânlarını ketm etmezler ise, beher sene mevâcibleri nakden iʿtâ olunacağını ifâde ve ibrâz-ı sadâkate [Ü2 101b] teşvîk ve mevcûd ve nâ-mevcûdu tahkīk ile mevcûda göre mevâcibi tevzîʿ ü tefrîk etmek ve her birinin şöhret ve vasf ve isim ve şahsını tasrîh ile getürdiği defterin sıhhati bu tarafda dahi tahkīk derecesine resîde olursa, baʿde-ezîn o defter mûcebince mevâcibleri beher sâl nakden irsâl olunmak ʿalâ vechi'z-zeyl kānûn-nâme-i hümâyûna idrâc olundu.