Topçu-başı ve kethudâlardan sâbık u esbak altı neferin işbu tertîb-i cedîdde meʿâşlarına halel tetarruk edüp, zarûretden vikāyeleri muktezây-ı şân ve şükûh-ı Saltanat olmağla, sâbık Topçu-başı Hasan Ağa'ya senevî bin beş yüz guruş ve esbakı Dervîş Mehmed Ağa'ya beş yüz guruş ve esbakı Seyyid ʿAbdullah Ağa'ya yedi yüz elli guruş ve esbakı ʿAli Ağa'ya bin beş yüz guruş ve Kethudây-ı sâbık Seyyid İbrâhîm Ağa'ya beş yüz ve esbakı Nuʿmân Ağa'ya beş yüz guruş -ki cemʿan beş bin iki yüz elli guruş eder- bunlara senevî [Ü2 98b] meʿâş tertîb olunup, mukaddem tertîb olunan Ocağlu meʿâşları misillü mevâcib icmâline idhâl ve üç defʿada iʿtâ olunmak üzere yedlerine senedât verilüp, iktizâ eden mahallere ʿilm ü haberleri irsâl olundu.