Birkaç nefer cerrâhın Top-hâne Ocağı'nda vücûdları ilzâm olduğuna binâʾen, Cerrâh-ı Evvel ve Sânî ve Sâlis ve Râbiʿ ve Hâmis iʿtibârıyla fenninde hâzik beş nefer Cerrâh intihâb olunup, Cerrâh-ı Evvel'e şehriyye yirmi guruş [Ü2 98a] ve Sânî'ye on sekiz buçuk guruş ve Sâlis'e on yedi guruş ve Râbiʿa on beş buçuk guruş [Ü1 92a] ve Hâmis'e on dört guruş meʿâş taʿyîn olunduğundan başka, Cerrâh-ı Evvel'e yevmiyye bir buçuk kıyye lahm ve altı çift nân ve bâkī cerrâhlara ʿale's-seviyye birer kıyye lahm ve dörder çift nân-ı ʿazîz taʿyîn olunup, mecrûhlara iktizâ eden estârın mikdârı kıyâs ile maʿlûm olmayup, iktizâ eyledikde, mecrûhlara lâzım olacak estâr, Nâzır maʿrifetiyle Cebe-hâne'den lüzûmu kadar ahz olunacağı misillü muktezî olan edviye dahi, Nâzır maʿrifetiyle tedârük olunmak ve tertîb olunan cerrâhlardan biri fevt ve yâhûd âhar cihetle yeri hâlî kaldıkda, Sânî, Evvel ve ʿale't-tertîb Hâmis'e dek hareket ile Hâmis olacak kimesne Hâssa Cerrâh-başısı maʿrifetiyle lede'l-imtihân istihkākı nümâyân olursa, ʿarz u inhâsıyla nasb olunmak ve neferât-ı mezkûreden iki neferi hıdmetleri mahallinde leyl ü nehâr mevcûd ve taʿlîm vakitlerinde cümlesi hâzır bulunmak şart kılındı.