Topçu neferâtı tekmîlinden sonra sürʻat toplarının her birine onar tüfengçi tahrîriyle her birinin maʻa-kisve-behâ yevmiyyeleri yirmi beşer akça olmak üzere kānûn-i cedîdde gerçi mastûr olup, ancak baʻzı mevâdd-ı lâzimenin tezyîline ruhsat verilmiş olmağla, Topçu tertîbi gibi bu tüfeng-endâzlardan dahi, beher topa bir nefer usta ve bir nefer Yamak ve sekiz nefer tüfeng-endâz olarak tertîb olunup, usta ve yamakların yevmiyye ve kisve-behâlarında nefer ile fark olmak ve kara-kullukçuların yevmiyyesi otuzar akça olup, maʻa-hâzâ bunların meşakkatleri dahi ziyâde olmağla, bunların dahi yevmiyyeleri o mikdâra iblâğ olunmak istısvâb olunduğuna binâ'en, tüfeng-endâz neferâtı ustalarına yevmiyye maʻa-kisve-behâ [Ü1 91b] altmışar akça ve yamaklarına maʻa-kisve-behâ kırk beşer akça ve mâʻadâ neferâta ʻale's-seviyye maʻa-kisve-behâ otuzar akça yevmiyye taʻyîn olunmak ve bu neferât yirmi beş ortadan olduklarına binâ'en, her birinin zabt u te'dîbi, mensûb oldukları ortalar zâbitânına tefvîz olunup, fekat cümlesi taʻlîm mahalline geldiklerinde, taʻlîm ve teʻallümlerine nezâret ve hatâları vâkiʻ oldukda, îkāz ve san'atlarını yoluyla irâ'et içün bir Sergerde'ye muhtâc olmalarıyla kisve-i mahsûsa ve senevî beş yüz guruş meʻâş ile bir kimse intihâb ve cümle tüfeng-endâzlara Tüfengçi-başı nasb oluna. Ve Tüfengçi-başılık münhall oldukda, hâricden biri nasb olunmayup, tüfeng-endâz ustalarından sinn ve liyâkat cihetiyle ercahı bi'l-intihâb Tüfengci-başı nasb oluna. Ve pîr ve ʻamel-mânde olduklarında, tekāʻüdlükleri kānûn-nâme-i hümâyûnda mastûr Çorbacı tekāʻüdü gibi ola. Ve tüfeng-endâz ustalarının meşakkati top ustaları gibi olup, sâyir tüfeng-endâz neferâtı gibi Topçu neferi olmalarında tenezzül olmağla, bunların dahi ʻAlemdârlığ'la yolları işlemek içün tüfeng-endâz ustaları dahi top ustalarıyla müsâvî olarak kendü ortaları ʻAlemdârlığı münhall oldukda, top ustalarıyla tüfeng-endâz ustalarının her kangısı eski ise, ol eski bulunan top ustası ve yâhûd tüfeng-endâz ustası bulunduğu ortaya ʿAlemdâr nasb oluna.