Bundan akdem Vidin Sancağı, Vezîr Gürcü ʿOsmân Paşa'ya tevcîh olunup, Çerhacı şeklinde Vidin bâgīleri üzerine meʾmûr kılınmışidi. Müşârun ileyh ile Vidinli, birkaç defʿa âheng-i ceng [Ü2 75b] ve miyânelerinde bu cihetle hıkd u husûmet vukūʿ bulup, ihde't-tarafeyn dîgerine bâgız u dil-teng olduklarına binâʾen, ʿazli zarûriyyât-ı vakitden maʿdûd ve Silistre Vâlîsi Vezîr Küçük ʿAbdî Paşa civârda bulunmağla, Vidin tevcîhine salâhiyyeti meşhûd [Ü1 72a] olup, müşârun ileyhimânın mansıbları ibdâl ve işbu şehr-i Receb-i şerîf'in [yirmi] ikinci günü kapu kethudâlarına ilbâs-ı hilʿat ile tevcîh ve meʾmûriyyet emirleri irsâl olundu. Vidin muhârebesinde mecrûhan vefât eden Bosnalı Ahmed Paşa'nın birâderi Hasan Bey, maʿrekede isbât-ı zât ve birkaç kerre hark-ı sufûf-ı bugāt eylediğini beyân ile Rütbe-i Mîr-i mîrânî'ye sezâvâr olduğunu Bosna ve Belgrad vâlîleri işʿâr etmeleriyle, mûmâ ileyh Rütbe-i Mîr-i mîrân'ı ʿinâyet ve Mîr-i mîrân'dan Kars Muhâfızı olan İbrâhîm Paşa, âvâre-i ʿakd ü hall olmak takrîbi ile umûr-ı serhadd muhtell olup, bu esnâda ehâliyle münâfeseleri safvete muhavvel olan Nuʿmân Paşa'ya Kars muhâfazası tevcîhini Erzurum Vâlîsi Vezîr Yûsuf Ziyâ Paşa hazretleri tahrîr etmeleriyle, muhâfaza-i mezkûreden İbrâhîm Paşa tahvîl ve yerine Nuʿmân Paşa tavsîl olundu.