Erâzil ü eşhâsa öteden berü muʿayyen olan Hasköy Aʿyânı Emîn, Bilâslı Mehmed Paşa tarafından Mütesellimlik ile sûreten teʾmîn olunmuşidi. Mûmâ ileyh tarafından şakī-yi merkūm katl olunduğundan gayri, dağlı eşkıyâsı sergerdelerinden olup, bir zemândan berü seg-i herze-meres gibi etrâfda pûyân ve fursat bulduğu mahalleri tâlân eden “Acı Manav” nâm şakī üç-beş yüz kadar küştenî ile Gümülcine Kazâsı'nda geşt ü güzâr [Ü2 76a] ve reʻâyâ ve ebnâ'-i sebîli mübtelây-ı mazârr eylediği, dağlı eşkıyâsı üzerine meʼmûr hasekîlerden Mustafa Hasekî'nin maʻlûmu olup, bağteten üzerlerine hücûm ile cemʻiyyetlerin perîşân ve vâfirini küşte-i dâne-i tüfeng ü sinân edüp, sergerdeleri Acı Manav hîn-i maʻrekede mecrûh olup, bir karyede helâk ve pelâs-ı hayâtı çâk-çâk olduğu haberi, işbu Şa‘bânü'l-muʻazzamın ikinci günü Edirne [Ü1 72b] Bostâncı-başısı tarafından vürûd edüp, ser-i maktūʻları vazʿ-ı meydân-ı hızlân ve sebeb-i terhîb-i kulûb-ı ehl-i tuğyân kılındı.