Belgrad ile Vidin miyânında vâkiʿ adada baʿzı iltizâmât ile kesb-i kuvvet ve şöhret eden Köse Mustafa ve Belgrad matrûdları, Belgrad Kalʿası'na duhûl sevdâsıyla Vidin [Ü2 74a] mütehayyizlerinden Pâsbân-zâde ʿOsmân Ağa'dan istimdâd ve ol dahi iktizây-ı gayret-i câhiliyye ile merkūmlara iʿânet ü imdâd eylediğinden gayri, Vidin ve Ada kalʿalarından top ve mühimmât ihrâcıyla bâzû-yı fesâdlarına miknet ve kulûb-ı zaʿîfelerine kuvvet vermişidi. Bugāt-ı mezkûre Belgrad'a teveccüh ü ʿazîmet ve Ağa bulunan Kul Kethudâsı sâbık Çelebi Mustafa Ağa ve sâyir zâbitân Belgrad ile bi'l-muhâbere muvâfakat ve iʿânetleriyle varoşa dâhil ve bu haber-i hâyil, Muhâfız bulunan Vezîr Mustafa Paşa'nın sâmiʿasına vâsıl oldukda, yerlü neferâtıyla kalʿaya tehassun ve defʿ-i sâyil sûretinde temekkün eylediği teʿayyün eyledikde, Bosna ve Rumeli taraflarından bi-tarîkı'l-istinfâr asker taʿyîn ve Rumeli Vâlîsi Vezîr es-Seyyid Mustafa Paşa'ya dahi iyâlet ve sâyir asker ile bi'n-nefs Belgrad'a varup, varoşda olan eşkıyânın istîsâli tenbîh ü telkīn olunmuşidi. Belgrad Muhâfızı mukaddemâ eşkıyânın hareketi ihtimâliyle Delîl-başısı'nı Morava'ya ve Silahdârı'nı Pojarafça'ya [Požarevac] irsâl edüp, mûmâ ileyhimâ Belgrad matrûdlarının hufyeten varoşa duhûllerini istihbâr ve ʿale'l-ʿacele oldukları mahalden hareket ile bir takrîb kalʿaya girüp, birkaç sâʿatden sonra kalʿa kapusun açup, varoşda olan bugāt ile muhârebeye sarf-ı iktidâr ve ʿavn-i melik-i Kahhâr ile bugātın yüzleri dönüp Vidin'e doğru firâr ve hîn-i maʿrekede nısfı derecesi helâk ve üftâde-i hufra-i hâk olup, gāyile-i mezkûre ber-taraf ve Belgrad Ağası sebeb-i nifâk ile resîde-i ʿurza-i telef ve Niş Ağası Hasan Ağa [Ü1 71a – Ü2 74b] mûmâ ileyhe halef olup, bugāt ile ittihâd töhmetiyle mezkûr olan dört Orta dahi, Sinob'a tağrîb ve sâyir kılâʿdan bedelleri tertîb olundu. Vidin'e firâr eden eşkıyâ yine mûmâ ileyh iʿânetiyle Belgrad'a hücûm içün tehaşşüd ü ictimâʿ ve bir mikdârı Kalafat'a ʿubûr ve memleket-i Eflâk'a tesallut ile tahdîş-i esmâʿ eyleyecekleri istimâʿ olunup, Pâsbân-zâde'nin Belgrad matrûdlarını istishâb cünhası teʾdîbini îcâb etmekle, lede'l-istişâre Rumeli Vâlîsi, eyâlet askeri ve sâʾir meʾmûrlar ile Vidin'e doğru tahrîk-i rikâb ve Keşan'da mütekāʿid olan Gürcü ʿOsmân Paşa'nın dahi Vezâret'i ibkā ve Niğbolu'ya varup, o havâlîde müctemaʿ olan asker ile Vidin'in berü tarafını ihâta vü istîʿâb etmek ve Belgrad Vâlîsi dahi muhâfazaya kâfî askerin fazlasına bir münâsib Başbûğ nasbıyla o tarafdan Vidin'e sevk edüp, bi'l-ittifâk defʿ-i erbâb-ı şikāk etmek ve ol bâbda cümlesine ʿale'l-infirâd ısdâr-ı menşûr ve bu ictimâʿdan garaz Belgrad matrûdlarıyla Pâsbân-oğlu'nun izâlesi olup, Vidin ehâlîsi bu bâbda maʿzûr ve haklarında kasd-ı âhar olmadığı ifâdesiyçün Ocak tarafından mekâtîb ile kul çavuşları gönderilüp, Vidin Kalʿası bu vechile mahsûr ve birkaç defʿa tarafeyn muhârebeye tesaddî eylediler ise dahi, rûz-i Kāsım'ın tekarrübü maslahatı, âtiyeye te'hîr eylediğini Rumeli Vâlîsi tahrîr ve mûcebince kışlak evâmiri taraflarına tesyîr olunmuşidi. O esnâda Vidin ehâlîsinin müteʿaddid ʿarz u mahzarları ve Pâsbân-oğlu'nun bir kıtʿa ʿarz-ı hâli vürûd edüp, Belgradlu'yu nefs-i Vidin ve kazâlarından tard ve sırran ve ʿalenen tesahhubdan keff-i yed [Ü2 75a] ve Pâsbân-oğlu fîmâ-baʿd kendü hâliyle mukayyed olup, civâr [Ü1 71b] kazâlarına taʿarruzdan ve vülât-ı ʿizâma muhâlefetden rücûʿ u inâbet eyleceğine mütekeffil ve ağavât ʿuhdesinde olan Vidin cizyesi ve Ocağlık olan mukātaʿâtın emvâl-i mîriyyesi iki yüz kîseden ziyâdeye mütehammil olup, Pâsbân-oğlu'nun ʿuhdesine beş yüz kîse ile ilzâm ve tahmîl ve yamakāndan hâric ü dâhilde olan esâmîlerden elli bin akça tenzîl olunup, tashîh-i mevcûd zımnında Sofya'da olan bir senelik mevâcibden ol mikdâr fürû-nihâde olunarak, tevzîʿine bir muʿtemed Mübâşir taʿyîni ve yeniçeri mevâcibi fîmâ-baʿd sâl-be-sâl Ocağlık ve sâyir emvâlden havâle olundukça, mahlûlâta dikkat ve mevâcib husûsunda bu vechile ibrâz-ı hıdmet ve sinîn-i güzeşte mevâcibleri mîrîye teberruʿ ve Eflâk'dan gayr ez- nizâm zahîre mutâlebesinden ferâğ ile izhâr-ı firûtenî ve tazarruʿ eyledikleri, meʾâl-i ʿarz-ı hâllerinden münfehim olup, şurût-ı mezkûre üzere ʿafv olunmaları husûsu mübârek Rikâb-ı kâm-yâb'a telhîs olunup, makrûn-ı müsâʿade-i Cihân-bânî ve ol bâbda lâzım gelan ʿafv fermânı şeref-rîz-i sudûr ve mahallerine irsâl ile pâ-der-rikâb olan cümûʿ-ı leşker ve bu sebeble muztarr olan ehl-i hazar ve veber-i gunûde-i pister râhat u huzûr oldu.