Tersâne-i ʿâmire'de olan sütûn-dâr ancak bir sefîne kalafatlanmasına medâr ve bu sebeble lede'l-lüzûm terâhî-yi maslahat hâletleri bedîdâr olduğunu Cezayirli Hasan Paşa te'emmül ile birini dahi îcâd ve dîgerine imdâd eylemişidi. Ancak sütûn-ı mezkûr ahşâbdan masnûʿ olup, birkaç senede bir tecdîd ü taʿmîre mess-i ihtiyâc ve ibkāsı mazarrat-ı mîrîyi intâc etmekle, külliyyen hedm ü imhâ ve birbirine muttasıl kârgîrden üç kıtʿa dâr-ağacı binâ olunmak irâde-i seniyyesi rû-nümâ ve fi'l-hâl binâsına mübâşeret ve fî-akrebi'l-eyyâm tekmîline himmet olunduğundan gayri, şalopeler içün dahi bir mahall-i mahsûs olmayup, sugr-i Kâğıd-hâne'de müstakıllen gözler yapılma tasvîb ve ol dahi himmet-i Şehriyâr-ı cihân-nasîb ile tekmîle karîb olup, bir müddetden berü inşâsı cây-gîr-i zamîr olan havz-ı kebîrin bed'ine dahi ikdâm ve inşâ'allâh baʿde'l-hitâm tafsîli havâle-i ʿuhde-i kalem-i nâdire peygām kılınur. [Ü1 70b]