İşbu Şevvâlü'l-mükerremin üçüncü İsneyn günü tevcîhât vukūʿ bulup, hademe-i Bâb-ı ʿâlî ve defterdârân ʿale'l-ʿumûm şeref-i ibkā ile [Ü1 70a] nâyil-i mekāsıd ü mürûm olup, mansıb-ı Tevkīʿî, sâbıkā Kethudây-ı Sadr-ı ʿâlî ʿAbdullah Birrî Efendi'ye ve Defter Emâneti, Re'îsülküttâb-ı esbak Firdevsî Efendi'ye ve Büyük Rûznâme, ʿİsmetî Efendi'ye ve Başmuhasebe, esbakı Seyyid Mehmed Efendi'ye tevcîh olunup, sâyir menâsıb dahi erbâbına tefvîz ve baʿzı kesâna mansıba bedel ʿatâyâ taʿvîz olundu. Yevm-i mezkûrda Anadolu Eyâleti, Vezîr Seyyid ʿAli Paşa'ya ve Mısır Eyâleti, Vezîr [Ü2 73b] Ebûbekir Paşa'ya ve Diyarbekir Eyâleti, Vezîr Sâlih Paşa'ya; Trabzon Eyâleti, Mîr-i mîrân'dan Yûsuf Paşa'ya ve Niğde Sancağı, sâbıkā Trabzon Vâlîsi Vezîr Seyyid ʿOsmân Paşa'ya; Resmo Sancağı, Mîr-i mîrân'dan ʿAli Paşa'ya; Sultân-önü, Hafız Paşa'ya; Akseray, İbrâhîm Paşa'ya tevcîh ü ʿinâyet olundu.