Mûmâ ileyh bin yüz otuz yedide Dîvân çavuşlarından “İbrâhîm Çavuş” nâm kimesnenin sulbünden zuhûr edüp, eyyâm-ı şebâbında Hekîm-başı Saʿîd Efendi dâiresinde terbiye olarak yetmiş üçde ru’ûsa nâyil ve devr-i ʿadîmü'l-cevr-i [Ü2 73a] hazret-i Mustafa Hânî'de Cerrâh-başılık ile ibtidâ matlabına vâsıl olmuşidi. Hudâvendigâr-ı esbak ʿasrında Riyâset-i etıbbâ ile ser-firâz ve doksan sekizde Selânik Kazâsı ve Mekke Pâyesi'yle mümtâz olup, iki yüzde İslanbol Pâyesi'yle dil-şâd ve sene-i merkūmede Gelibolu'ya ibʿâd olunup, bir müddetden sonra edây-ı hacca me’zûn ve Tâyif'de ikāmeti içün sudûr-ı irâde-i emr-i hümâyûn olup, iki yüz üçde ıtlâkına müsâʿade ve İncir Köyü'nde ikāmeti irâde ve iki yüz beşde hânesinde istirâhat etmek üzere tahsîl-i ruhsat edüp, iki yüz altıda bi'l-fiʿl Anadolu Sadâreti'yle kâm-rân ve iki yüz dokuzda Rumeli Kadıʿaskerliği ile müşârun ileyh bi'l-benân olup, baʿde'l-infisâl intikāl eyledi. Müşârun ileyh ʿilm-i tabâbetde sânî-yi Bukrât ve fenn-i nabz-âşinâyîde hem-tâ-yı Sokrât olup, ancak hırs u tamaʿda Eşʿab ve kati çok ahvâlde hekîm-i mezheb idi.