Nemçe Musâlahası ʿakabinde her tarafdan katʿ-ı hudûd olunup, Bosna hudûdu İzmolnac [ازمولناج = Smolijanac] Dağı'nda ve mebde'-i nokta ve mesâha vü mîlde vâkiʿ muʿâraza sebebleriyle katʿ olunamayup, muhaddidlerin meksi üç sene mümtedd ve Âsitâne-i saʿâdet'de mecâlis-i ʿadîde inʿikādıyla Nemçelü'yü ilzâm mümkin olmayup, tahsîl-i menâfiʿ kasdıyla ru'ûnetleri müştedd olmuşidi. Harîta-i maʿmûlün-bihâda muʿayyen olan erâzî baʿde't-tahdîdi ve'l-mesâha mikyâs-ı harîta üzere Nemçelü'ye metrûk erâzî yirmi dört mîlden ne mikdâr noksân zuhûr eyler ise, bedeline sâyir mahalden taʿvîzan erâzî terk olunmak iddiʿâlarında ısrarları takrîbi ile 'ahden Devlet-i ʿaliyye'ye [Ü2 70b] reddi lâzım gelan Dubica ve Gradişka ve Novi kalʿaları yedlerinde kalup, bilâhare devlet meʾmûrları gâh ʿunf ve gâh lutf vâdîlerini ihtiyâr ile mesfûrları ilzâm ve maslahatı ber-vefk-ı merâm karîn-i hitâm eylediler. Tafsîli bu ki, evvelki sene tarafeyn meʾmûrları ittifakıyla Dostorlik [Ü1 67b] Kalʿası'nın garbî-yi şimâlî tarafında vâkiʿ Ecin Botog'ın Nehr-i Korana'ya munsab olduğu mahalle vazʿ olunmuş olan ʿalâyimden nehr-i mezbûrun vasatı hadd-i fâsıl iʿtibârıyla Dizernik [دزرنيك = Dreznik] palangasından “Gavranic Brod” dimekle maʿrûf mahalle dek gidilüp, mahall-i mezkûr mahrec iʿtibâr olunup, nehr-i mezbûrun sâhil-i yemînine bir ʿalâmet ve andan hatt-ı müstakīm ile “Pâs” nâm depe eteğine gidilüp, tasarruf-ı Devlet-i ʿaliyye'de olan İzacık Kalʿası ehâlîsinin kemâl-i istirahatı içün Nemçelü tarafından teʿahhüd olunduğu vech üzere zikr olunan depede katʿâ çardak ve sâyir ebniye ihdâs olunmayarak vazʿ olunacak sâdece ʿalâmet dahi kalʿa-i mezbûreden dokuz yüz tevâz mikdârı mesafe baʿîd tutulmak ve andan İdeyşâ Brod nâm bâyıra doğru gidilüp, ol havâlîde vâkiʿ cibâlin şarki etekleriyle Kolikot [قولی قوط = Klokot] kaynağına dek varılup, orada bir ʿalâmet ve andan yine ol havâlîde vâkiʿ cibâlin şarki etekleriyle Zevale [زواله = Zavalje] Kalʿası'na dek varılup, kalʿa-i mezbûre hedm birle sadece bir ʿalâmete tagyîr olunmak ve andan “Labâz” nâm çiftlik, mevcûd olan yüksek dağın şark tarafında vâkiʿ eteğine bir ʿalâmet ve andan Dostorviçe-i atik [دستوروية عتيق = Ostrovitz] Kalʿası'nın taraf-ı cenûbunda nîm sâʿat mesâfeye bir ʿalâmet ve andan Nehr-i Una [Ü2 71a] üzerinde vâkiʿ Vakıf Kalʿası'ndan bir sâʿat yukarı Nehr-i Una'nın sâhil-i yesârıyla gidilüp bir ʿalâmet ve nehr-i mezbûrun sâhil-i yesârı hadd-i fâsıl olarak menbaʿ-i garbîsine doğru gidilüp bir ʿalâmet ve andan yüksek dağların arasından en doğru yoldan hudûd-ı selâseye varılup, mahall-i mezbûra bir ʿalâmet vazʿ u nasb ile tahdîd-i hudûd ve temyîz-i sügūr olunmak ve bu ʿalâmetlerin dahi aralarına vazʿ-ı ʿalâyim olunup, cihât [Ü1 68a] ve evsâfıyla mufassal hudud-nâme tahrîriyle mübâdele-i senedât olunmak ve Nehr-i Korana'nın vasatı beyne'd-devleteyn hadd-i fâsıl iʿtibâr olunduğuna binâʾen, fevâyidi ber-vech-i müsâvât tarafeyne ʿâyid olup, saky-i mevâşî ve erâzî olunup, ahad-i tarafeynden teʿaddî vü tecâvüz vukūʿ bulmayup, Nemçelü yakasında vâkiʿ ormanlardan nehren sallar tenzîl ve imrâr olundukça, Bosna cânibinden ʿadem-i mümânaʿat ve lede'l-lüzûm seddler inşâsı lâzım gelür ise, terâzî-i tarafeyn ile câyiz olmak üzere bu tarafda nizâm verilüp, sûret-i nizâm Bosna Vâlîsi Vezîr Hüsâmeddîn Paşa ve ʿİsmetî İsmâʿîl Efendi ve Kapucu-başı Hüseyin Ağa ve Mühendis ʿAbdurrahmân Efendi taraflarına ısdârı lâzım gelan evâmir-i ʿaliyye ile irsâl olunup, vusûlünde mâddeyi sûrete tatbîk ve irâde-i devlete tevfîk ile katʿ-ı hudûd ve vazʿ-ı ʿalâyim ve mübâdele-i senedât ile Devlet-i ʿaliyye me'mûrları işbu Ramazânü'l-mübarekde Âsitâne-i saʿâdet'e vürûd eylediler. Bu makūle hıdemât-ı Devlet-i ʿaliyye'de bulunanların emekleri hebâ olmak revâ görülmeyüp, işbu tevcîhâtda “İsmetî Efendi'ye Büyük Rûznâme ve Hüseyin Ağa'ya Baş-bâkī-Kulluğu ve ʿAbdurrahmân Efendi'ye İbtidâ [Ü2 71b] Altmışlı Rütbesi ihsân ve cümlesi nâyil-i iltifât-ı Pâdişâh-ı zemân oldu.