Sevâhil ü cezâyire mücâvir olan devletlerde tersâne binâsı ve merâkib ü sefâyin inşâsı, umûr-ı zarûriyye-i Saltanat'dan olduğuna binâ'en, Devlet-i ebed-müddet dahi tavr-ı ʿasr üzere tersâne umûruna sarf-ı himmet edüp, tertîb-i cumûʿ-i Levend ve inşây-ı süfün-i kûh-mânend ile tantana-i kadr ü şânını bülend edüp, kâffe-i levâzım-ı merâkib ve beher sene iktizâ eden revâtib ü mevâcib mahallerinden taʿyîn ve niçe niçe gazâlar ile düşmen-i dîni gavta-hor-ı deryây-ı âh u enîn etmişidi. İmtidâd-ı vakt-i hazar ve inkıtâʿ-ı eyyâm-ı sefer sebebi ile Donanma-yi hümâyûn'a ʿadem-i ihtimâm ve bâ-husûs karîbü'l-ʿahdde Cezâyirli Hasan Paşa, niçe şühûr u aʿvâm riyâset-i esâtîl ile bekâm olup, cevâyiz ü rişâ ve şefâʿat ü ilticâ ile beylikleri beyʿ-i men-yezîd ve erbâb-ı istihkākı [Ü2 58b] vusûl-i matlabdan nâ-ümmîd eyleyüp, o makūle kapudanlar dahi sedd-i sülme-i ihtiyâc ve nakden verdikleri câyizeyi ihrâc içün beher sâl vâfir mâl ile istihsâl olunan [Ü1 56a] mühimmat ve donanmayı nehb ü târâc ve behâsını hemyân-ı hıyânetlerine vazʿ u idrâc eylediklerinden fazla, neferâta tahsîs olunan taʿyînâtı tenkīs ve hâsılını nefislerine tahlîs eylediklerinden, Donanma-yi hümâyûn'a zaʿf târî ve neferâtına ser-te-ser fütûr sârî olup, bu esbâb ile pîrâmen-i devletde istâde-i kemîn-gâh-ı fursat olan aʿdâ ile mukāvemet, hâric-i yârây-ı istitâʿat ve belki bu ʿacz ü rehâvet, galeyân-ı dîg-i fesâd u tamaʿlarına ʿillet olacağı cezmen maʿlûm-ı Pâdişâh-ı İskender-sîret olmağla, aʿzam-ı umûr-ı devletden olan işbu donanma maslahatı dahi, ittifâk-ı erkân-ı devlet ile pezîrufte-i hüsn-i nizâm ve ʿale'l-ıtlâk teksîr-i mevâcib ü erzâk ile râbıta-bend-i istihkâm olması iltizâm olunup, cenâb-ı hazret-i Hakk, Şehriyâr-ı cemîlü'l-âsârı bu bâbda dahi muvaffak edüp, Donanma-yi hümâyûn ahsen-i nesak üzere tanzîm ve ru'esâ ve neferâta resm-i harb-i deryâ fürû ve usûlüyle taʿlîm olunup, şurût-ı mukarreresi maʿlûm-ı erbâb-ı hads ü yakīn olmak içün ruhsâre-i sahâyif-i vekāyiʿ-i ârâyiş-kârı kalem-i erjeng-i sanâyiʿ ile tezyîn kılındı.