[Ü1 55b – Ü2 58a] Maraş Sancağı, Mîr-i mîrân Dervîş Hasan Paşa'ya tevcîh olunduğuna binâ'en, Mutasarrıf olduğu Beyşehri Sancağı münhall ve sâbıkā Resmo Mutasarrıfı Mahmûd Paşa, livâ'-i mezkûr ile makzıyyü'l-emel olup, mâh-ı mezkûrun on ikinci günü Haremeyn-i şerîfeyn'e irsâli muʿtâd olan Surre-i hümâyûn dahi Emîni olan Yûsuf Paşa Kapu Kethudâsı Mehmed Emîn Ağa'ya teslîm ve çekdiriye vazʿ ve Üsküdar'a imrâr ile resm-i alay icrâ vü tetmîm olundu. İmâm-ı Sânî-yi hazret-i Cihân-bânî Hâfız Ahmed Efendi iki yüz on senesi Rebîʿulevvel'inden iʿtibâr ile Edirne Pâyesi'ne nâyil ve Nakīb-zâde Mehmed Emîn Efendi iki yüz on bir senesi Ramazânı gurresinden zabt eylemek üzere bi'l-fiʿl Yenişehir-i fenâr Mevleviyyeti'ne vâsıl oldu.