Kalem-rev-i hükûmet-i Şâhâne olan Memâlik-i vesîʿatü'l-mesâlik'de mazalle-nişîn-i hâb-ı rahat olan fukarâ vü zuʿafânın bir müddetden berü tesallut-ı zaleme vü cebâbire ile hâlleri perîşân ve mesârıf-ı zâyide ve tahmîlât-ı bilâ-fâ'ide ile harmen-i iktidârları sûzân-ı nîrân-ı husrân olup, beher sâl gayr ez-mesârıf-ı zarûriyye vilâyet umûru ve aʿyâniyye nâmıyla iki defʿa defter ibrâz ve “Harc-ı Defter” ismiyle kudât ve nüvvâba hakku's-sükût ifrâz eylediklerinden gayri, kazâlarda müteneffis bulunan bî-insâfları dahi, dâ'ire-i iştirâke idhâl ile zulm-i sarîh ve kadr-ı kabîha âgāz eyledikleriyçün, memâlik yevmen-fe-yevmen harâb ve intifây-ı mekâsib ile fukarâ aʿşâr-ı şerʿiyye edâsına bile kudret-yâb olmadıkları maʿlûm-ı [Ü1 54a] Şehriyâr-ı menîʿü'l-cenâb olup, bu zulm-i ʿâlem-sûzun dahi feyezân-ı nehr-i selsâl, ʿadâlet-i nasafetleriyle intıfâ-pezîr olması katʿâ matlûb-ı Tâc-dârî'leri olup, binâʾen-ʿalâ-zâlik bundan böyle senede iki defʿa kazâların mesârıf-ı sahîhası taʿyîn-i mevâdd ile defter ve tevzîʿ olunup, altı ayda bir mümzâ sûreti Der-i devlet-medâr'a ʿarz u takdîm ve defterlerde mesârıf-ı mechûle tahkīk eyledikde, [Ü2 56b] defteri imzâ eden hâkimden ve tevzîʿ eden aʿyân ve kazâ müteʿayyinlerinden tahsîl ve fukarâya istirdâd ü teslîm olunacağı tasmîm olduğundan fazla o makūle müzahrafât-ı dünyeviyyeye meyl ü rükûn ile fukarâyı sergerdân-ı tîh-i garâmet eden eşhâsın her biri eşedd-i siyâset ve teʾdîb ile muʿâkab olacağları ve defâtire nezâret ve tehkīh u tashîh-i mevâdd ile icrây-ı lâzime-i sadâkat eylemeleri bâbında Anadolu Defteri Nezâreti, Râsih Efendi'ye ve Rumeli, bi'l-münâsebe Yenişehirli Mustafa Beyefendi'ye ve Mora, ʿOsmân Efendi'ye ihâle olunduğundan mâʿadâ, mesârıfın mikdâr u kemmiyyeti tahkīk ve zâyid şey vazʿından hükkâm ve aʿyân ve sâyiri menʿ ü tazyîk mesâlihi içün her kazâda hademe-i devletden mücerrebü'l-etvâr bir âdem ikāmeti tasvîb ü ihtiyâr olunup, vaʿd ü vaʿîd ve teşdîd ü te'kîdi şâmil, etrâfa fermânlar neşr ü irsâl ve tantana-i ʿadl ü nasafet târem-i çarh-ı esîre îsâl olundu.