Aʿyânlık iddiʿâsıyla Söğüd Kasabası'nda ser-ber-âverde-i şekā ve “Paşa Ağa” lakabıyla şöhret-nümâ olan “İbrâhîm” nâm kimesnenin dil-rîş-i [Ü2 55b] zulm ü teʿaddîsi olan fukarâ, Dîvân-ı ʿâlî'ye iştikâ ve vilâyet defterine vâfir şey tahmîlini ifâde ile istirdâd-ı zâ'id ve te'dîbini istidʿâ etmişler idi. Merkūmun cinâyet-i sâbıkasına nazaran vücûb-i izâlesi zâhir olduğundan, şükâta ser-rişte verilmeyüp, sûret-i zâhirde ihzârına emr-i ʿâlî ısdâr ve kaydı görülmek irâdesi hufyeten Anadolu Vâlîsi'ne işʿâr olunup, müşârun ileyh tarafından cezâsı tertîb ve bu takrîb fukarây-ı kazâ tatyîb olundu. Eşiddâ'-i mültezimînden olup, mukaddemâ Atina mukātaʿasına mâlik olan Hasekî ʿAlî kendü hâlinde olmayup, vardığı mahallerde fukarâyı izrâr ve bâ-husûs Atina Mukātaʿası reʿâyâsını tecrîm ile vâfir mâl iddihâr eyleyüp, defʿ-i bertîl ü rüşvet ile şükâtını tard etdiremediği hâlde, baʿzı husûn-ı menîʿaya ilticâ ile ihtifâ ve bir müddetden sonra hakkında tevakkud eden âteş-i gayzın sükûn u intıfâsını hiss ile kayd-ı istitârdan rehâ bulup, kemâ-fi'l-evvel mecbûl olduğu mefsedeti icrâ eyler idi. Atina Mukātaʿası'nın bir hissesi Îrâd-ı Cedîd tarafında olup, [Ü1 53b] ber-vefk-ı nizâm merkūmun hissesiyle beher sene tâliblerine ilzâm olunduğuna tehammül edemeyüp, bi'l-külliyye mukātaʿanın zabtını nefsine tahsîs dâʿiyesiyle o tarafda olan hevâdârlarını tahrîkden hâlî olmadığı bi't-teharrî tahkīk olunup, mukātaʿaya târî olan ihtilâli izâha ve fukarâyı müstemirrü'z-zuhûr olan cevr ü teʿaddîsinden irâha maksadıyla izâlesi her tarafdan tasvîb vü teşvîk olunmağla, ru'yet-i hisâb sûretinde merkūm Dîvân-ı ʿâlî'ye ihzâr olunup, Çavuş maʿrifetiyle İstanköy [Ü2 56a] Cezîresi'ne iclâ ve birkaç günden sonra cesedi rûhundan ihlâ olundu. Ve Arnabud tâyifesinden “Baltacı Velî” nâm kimesne dahi bir şahs-ı fettân olup, Arnabud paşalarına gâh Kapu Kethudâsı ve gâh itâre-i ahbâr ile hudûs-i erâcîfin mebde' vü müntehâsı olduğuna binâ'en, ol dahi Bozca-ada'ya nefy ü tebʿîd ve müstehakk-ı katʿ-ı hablü'l-verîd kılındı.