Altı sene mikdârı hıdmet-i celîle-i Silahdârî'de dâric-i medâric-i kâm-kârî olan ʿAbdullah Ağa, kûşe-i vahdet ihtiyârıyla fîmâ-baʿd enfâs-ı bâkıyyesin sarf-ı duʿây-ı Tâc-dârî etmek arzusunda olduğu istişʿâr ve işbu Cumâdelâhire'nin yirmi birinci sebt günü ʿazl olunup, eslâfına tahsîs olunan mükemmel taʿyînât ile dil-sîr-i niʿmet-i meserret ü istibşâr kılınup, ʿutekāy-ı hazret-i Hılâfet-penâhî'den el-yevm Seferli Kethudâsı olan İslâm Ağa'da bu hıdmet-i seniyyeye liyâkat ü istihkāk müşâhede olunmağla, yevm-i mezkûrda Silahdârlık câh-ı refîʿine iʿtilâ ve Çukadâr Ağa bulunan Süleymân Ağa'nın bu sûretde Enderûn-ı hümâyûn'dan ihrâcı iktizâ eyleyüp, hall-i İlâhî [Ü1 53a] vukūʿunda, emeği mukābili nân-pâre vaʿdiyle gûş-i emeli müşennef ve Rikâbdâr Hafız Mustafa Ağa mûmâ ileyhe halef olup, Dülbend Ağası Ahmed Ağa, Rikâbdâr ve Miftâh Ağası Hasan Ağa, Dülbend Ağalığı'yla kâm-kâr olup, Pîşgîr Ağası Saʿîd Ağa, Ağa-yı Miftâh ve Müezzin-başı Halîl Ağa, Pîşgîr Ağalığı'yla bâng-zed-i mahfil-i fevz ü felâh ve Hâne-i hâssa'dan Kul-oğlu Mehmed Ağa, Seferli Kethudâsı nasbı ile tertîb-sâz-ı mevkib-i inbisât u irtiyâh oldu.