İskenderiyye Mutasarrıfı Mahmûd Paşa fîmâ-baʿd hılâf-ı rızâ harekete ictirâ etmeyüp, sâyir vüzerâ gibi mansıbında ikāmet ve bilâ-emr-i ʿâlî seyr ü hareketden mücânebet etmek şartıyla Vezâret'i ibkā olunmuşidi. Müşârun ileyh ʿahdinde pâydâr olmayup, bu esnâda Debre üzerine bi'n-nefs asker-keş ve bu sebeble ahvâl-i fukarâ müşevveş [Ü2 37b] olacağı bedîdâr olup, Debre'nin râh-ı râstı Ohri olmak takrîbi ile hasm-ı cânı olan Depedenli ʿAli Paşa'nın oğlu Muhtâr Paşa'ya Ohri Sancağı verildiği hâlde müşârun ileyhe sedd-i sedîd ve Caʿfer Paşa'nın Mahmûd Paşa ile ʿadâvet-i kadîmesi olup, Livâʾ-i Selânik ile ikdâr olundukda, teksîr-i asker ile ʿazîmetine mâniʿ olacağı gayr-i baʿîd olduğundan Ohri, Muhtâr Paşa'ya ve Selânik, Caʿfer Paşa'ya tevcîh olunup, Selanik [Ü1 36b] Mutasarrıfı Vezîr Ferhad Paşa'ya dahi İnebahtı Sancağı verildiğinden gayri, Âsitâne'de ikāmet ile sünûhât-ı İlâhiyye'ye muntazır olan Mîr-i mîrân Tâhir Paşa'ya ʿAlâʾiyye Sancağı ihsân ve şeref-yâfte-i sudûr olan evâmir-i ʿaliyyede Muhtâr Paşa ve Caʿfer Paşa'nın meʾmûriyyet-i hafiyyeleri beyân olundu.