Silistre Vâlîsi olan ʿAbdî Paşa mansıbına hareket hilâlinde dağlı sergerdelerinden [Ü1 36a] Hacı Manav ve Koca Ahmed'i hevâdârları olan bin kadar eşkıyâ ile dâʾiresine celb ve muztarib-i havf u vecel olan kulûb-ı kāsiyelerin nakd-i muʿaccel ve vaʿd-i müʾeccel ile izâle vü selb eyleyerek yola revân ve balkānı aşırdıkdan sonra Deliorman müteʿayyinleriyle nihânî haberleşüp, eşkıyây-ı mezkûrenin izâle-i vücûdları bâbında safka-zen-i ʿahd ü peymân olmuşidi. Bu hâl ile Yeni-bâzâr Kazâsı'na vusûl ve eşkıyâ dahi bir mahall-i karîbe nüzûl edüp, tertîb olunan etrâf askerinin tekarrübü ihbâr ve heman o gice bi-tarîkı'l-istinfâr üzerlerine hücûm olunup, ekseri âguşte-i hûn-ı demâr ve bakıyyesi râh-ı necât talebiyle serserî geşt-i vâdî-yi idbâr olup, turuk u mesâlik mesdûd olduğuna binâ'en, otuz nefer ecel-i nâ-resîdelerinden mâʿadâsı ʿâlem-i hestîden mefkūd oldukları haberi Vezîr-i müşârun ileyh tarafından vürûd eyledi.