Hâlâ Şâm Vâlîsi olan Cezzâr Ahmed Paşa'nın zulm ü teʿaddîsi, ehâlî-yi Şâm tarafından ilkā ve bu sene-i mübârekede Medîne-i münevvere'de muʿtâd üzere ikāmet etmeyüp, bağteten hareketinde hüccâcın bir mikdârı kāfileye yetişemeyüp, Medîne'de kaldıkları aʿyân-ı hüccâc tarafından takrîr ü inhâ olunduğundan başka, Îrâd-ı Cedîd iltizâmâtından olup, Rodoslu Ahmed Ağa ʿuhdesinde olan Gazze mukātaʿasına mebʿûs Mütesellim ʿAli Ağa'yı müşârun ileyh katl ü istîsâl etmekle, cevr ü gadrı tebeyyün ve vücûb-ı 'azli teʿayyün eylediği Rikâb-ı kâm-yâb'a 'arz olunup, ba'de'l-istişâre vüzerâdan sâhib-i liyâkat bir vezîre Emâret-i Hâcc tefvîz olunmak irâde [Ü2 38a] olunup, şehr-i mezkûrun yirmi üçüncü günü hâne-i hazret-i Fetvâ-penâhî'de Sadriaʿzam ve sâyir 'ulemâ ve ricâl ictimâʿ edüp, Cezzâr Paşa'nın mesâvî vü kabâyihi tezkîr ve ʿAzm-zâde Vezîr ʿAbdullah Paşa'nın Mîrü'l-Hâcc olması karâr-gîr olup, sûret-i meclis beyânıyla taraf-ı hümâyûndan tahsîl-i ruhsat ve fi'l-hâl müşârun ileyhe Eyâlet-i Şâm tevcîh olunup, Kapu Kethudâsı'na ilbâs-ı hilʿat ve münhall olan Haleb Eyâleti, Hotin Muhâfızı Vezîr Ebûbekir Paşa'ya mülhakan 'inâyet olunup, İç-il Sancağı ilhâkıyla Karaman Eyâleti, merfûʿu'l-Vezâre Turunc-zâde Süleymân Paşa'ya ihsân ve Karahisâr-ı sâhib Sancağı tevcîhi ile sâbıkā Vidin Muhâfızı Vezîr Mehmed Paşa'dan [Ü1 37a] izâle-i teşvîş ü halecân olundu.