İcmâl-i ahvâli bâlâda güzâriş-pezîr-i hâme-i rengîn-tahrîr olan Ağa Mehmed Hân, bundan akdem birâderi [Ü2 36b] ‘Ali-kulı Hân'ı Revân Kal‘ası zabtıyçün taʿyîn edüp, ber-vech-i muhâdene maslahat-ı mezkûreyi [Ü1 35b] itmâm ile birâderinin muʿaskerine lühûk u ilmâm etmişidi. Müşârun ileyh birâderini istishâb ve Tiflîs Kalʿası üzerine şitâb edüp, sadme-i zûr-bâzûsuna Tiflîs Hânı mütehammil olmayup, firâr u gürîz ve Tiflîs halkının baʿzısını seby ve baʿzısını küşte-i hengâme-i sitîz edüp, derûnunda mevcûd emvâl ü nukūd gāret-ger-i asker-i Aʿcâm ve büyût u dekâkini harâb-kerde-i tîşe-i inʿidâm olup, bu hâl ile birkaç gün ârâm ve baʿdehû Tiflîs'e karîb Sınık-köprü'de nasb-ı hıyâm eylediğini Çıldır Vâlîsi, Erzurum Vâlîsi'ne ve ol dahi Devlet-i ʿaliyye'ye ifâde vü ifhâm edüp, bu makūle nev-devletân-ı rûzgârın kurb u civârda olan devletlere mazarratları maznûn u melhûz olan mazarratın kable'l-vukūʿ izâlesine tekayyüd ü ihtimâm bir emr-i mesnûn olduğuna binâʾen, işbu şehr-i Rebîʿulâhır'ın altıncı günü bi'l-cümle ʿulemâ ve ricâl-i devlet hâne-i Fetvâ-penâhî'de cemʿiyyet edüp, mâdde-i mezkûre der-meyân ve herkes hulâsa-i fikrini beyân ve gāyet-i meşveret, serhadlerde bulunan vüzerâ müteyakkız bulunup, Erzurum Vâlîsi'nin emr ü nehyine tebaʿiyyet ve Erzurum Vâlîsi dahi, Hân-ı müşârun ileyhin niyyet ve reftârını tashîh içün tarafından bir âdem irsâliyle çigûnegî-i ahvâline ıttılâʿdan ʿibâret olup, Erzurum Vâlîsi'nin Serʿaskerliği meclisde her ne kadar serd olunduysa dahi, hudûd-ı Devlet-i ʿaliyye'ye tehattî vukūʿundan mukaddem Serʿasker nasbı, Hân-ı müşârun ileyhi [Ü2 37a] tevhîş eyleyeceği delîli ile re'y-i mezkûr cerh ve ʿâkıbet-i emre intizâr ile metn-i mâdde şerh olunup, meclise gāyet ve meşverete nihâyet verildi.