Trablus Beylerbeyisi ʿAli Paşa ile Ocağlu'nun imtizâcı olmayup, yevmen-fe-yevmen miyânelerinde âteş-i fesâd ʿalev-gîr ve iki taraf birbirinden dil-gîr olduğunu, Cezâyir'de Yalı Vekîl-harclığı'ndan matrûd “Seydî ʿAli” nâm kimesne tahkīk edüp, tedârük eylediği asker ve sefîne ile Trablus'a vürûd ve müteʿayyinlerinden birkaç kimseyi tarafına celb ile isbât-ı vücûd edüp, Trablus'u zabt ve serkeşlerini râm ve vukūʿ bulan keyfiyyeti Devlet-i ebed-kıyâm'a iʿlâm ile Trablus'un tarafına tevcîhini istirhâm ve mûmâ ileyhe ber-muktezây-ı vakt ü hâl tevcîh emri irsâl olunmuşidi. Mûmâ ileyh ecânibden maʿdûd ve zulm ü sitem tarafına meyli meşhûd olduğundan, mûmâ ileyhi Trablus halkı istiskāl ve Mutasarrıf-ı sâbıkın oğlu Yûsuf Bey'de emârete liyâkat istidlâl olunup, Mîr-i merkūmu teşvîk ü iğrâ ve ol dahi Tûnus Ocağı'ndan istimdâd ile Seydî ʿAli'yi tard ve cemʿiyyetin ifnâ etmişidi. Trablus-garb'ın Rütbe-i Mîr-i mîrânî ile Yûsuf Bey'e tevcîh olunmasını Tûnuslular recâ eylediklerini Kapudân-ı deryâ Vezîr Hüseyin Paşa ʿarz u inhâ etmekle, ʿarzı mûcebince evâhır-ı Rebîʿulâhir'da livây-ı mezkûr Mîr-i mûmâ ileyhe sezâvâr görülüp, ol bâbda lâzım gelen emr-i celîlü'ş-şân ısdâr olundu.