Re'îsülküttâb olan Firdevsî Efendi bir müddet Ru'ûs Kalemi'nde müstahdem olup, seferde Tezkire-i Sânî ve Vekâlet-i Riyâset'le nâyil-i emânî olup, baʿdehû Âsitâne'de Tezkire-i Evvel ve Dürrî Efendi vefâtında bi'l-fiʿl Riyâset ile mübeccel olmuşidi. Efendi-i mûmâ ileyh egerçi birkaç mâh idâre-i âsiyâb-ı umûr-ı devlet ve icrây-ı ahkâm-ı Riyâset eyledi. Ancak lâzım-ı mâhiyyet-i Riyâset olan hilye-i kemâlât ü meʿârifden ʿârî ve ʿaraz gibi kāyim bi-gayrihî olduğundan, bi'l-ihtiyâc edânî-yi küttâba müdârî olduğu maʿlûm-ı hazret-i Tâc-dârî olup, binâ'en-ʿalâ-zâlik işbu Zilhicce'nin on ikinci günü Riyâset'den ʿazl olunup, Hubûbât Nâzırı Râtıb Ebûbekir Efendi'de vücûd-ı kābiliyyet ve bu mesnede ehliyyet melhûz olduğundan, li-ecli'l-ihtibâr câh-ı menîʿ-i Riyâset'e ihtiyâr ve sâbikā Tersâne Emîni İbrâhîm Efendi, Hubûbât Nezâreti'yle kâm-kâr kılındı.